Tez arada oqıǵa ornyna Jergilikti polısııa qyzmetiniń jol-patrýldik polısııasynyń qyzmetkerleri jetedi. Alaıda jas jigit sýǵa sekirip úlgergen. Qutqarýǵa alǵashqy bolyp Astana qalasy IID JPQ jol-patrýldik polısııasynyń leıtenanty Azamat Baltabaev kirisedi. Onyń sońynan Fransııa eliniń azamaty Jorj Kıeffer kómekke keledi. Ekeýi birlese jas jigitti sýdan alyp shyǵyp, alǵashqy medısınalyq kómek kórsetip, jedel járdem qyzmetkerlerine tapsyrǵan.
Jigittiń 1991 jylǵy Shyǵys-Qazaqstan oblysynyń turǵyny ekendigi anyqtaldy. Otbasylyq urys-keristiń saldarynan ózine qol jumsamaq bolǵan.
Fransııalyq azamat Jorj Kıefferdiń polısııa aǵa serjanty ekendigi jáne onyń Fransııa elshiliginiń qaýipsizdik jónindegi ofıseri bolyp qyzmet etetindigi anyq boldy.
Elordalyq polıseı Azamat Baltabaevtyń adam ómirin saqtaýdaǵy bul áreketi birinshi emes. Aǵymdaǵy jyldyń 2 mamyrynda ol «Irgız-134» ekıpajynyń quramynda bolyp Saraıshyq kóshesi boıyndaǵy páterlerdiń biri tútindep jatqandyǵyn baıqap, IISh Jedel basqarý ortalyǵyna shuǵyl arada habarlaǵan. Páterdiń altynshy qabatynda ózdiginen qozǵala alatyn qart jastaǵy áıel adamnyń jáne segizinshi qabattaǵy er adamnyń baryn bile salysymen Azamat Baltabaev olardy dalaǵa alyp shyqqan.
