Tilderdi damytý jónindegi óńirlik basqarmanyń uıymdastyrýymen «Tilderdi damytý men qoldanýdyń 2017-2019 jyldarǵa arnalǵan oblystyq is-sharalar jospary» sheńberinde 10-tamyz Abaı atamyzdyń týǵan kúni qurmetine arnalyp oblys ortalyǵynda «Abaı oqýlary» baıqaýy ótkizildi.
Sharanyń maqsaty – ózge ult ókilderi arasynda memlekettik tildiń qoldaný aıasyn keńeıtý, aqyn shyǵarmalaryn nasıhattaý arqyly qazaq mádenıetine, tili men ádebıetine degen jastardyń qushtarlyǵyn arttyrý eken. Aqyn óleńderin, qarasózderin oqý arqyly kórkemsóz sheberligin, til mádenıetin shyńdaý baǵytynda ótken baıqaýǵa 17 men 29 jas aralyǵyndaǵy qalalar men aýyldardan qatysýshylar keldi.
Bilim, ǵylym jáne óner taqyryptaryna órilgen poezııalyq shyǵarmasy men qara sózin mánerlep oqýdan, «Abaı joly» romanynan úzindini kórkem sheberlikpen jatqa jáne Abaıdyń ánderin oryndaýdan baıqaýǵa tústi. Sýrettegi Ksenııa Ronde maı aýdany, Malaısary aýylynan keldi. Qazaq tilin óziniń týǵan ana tilindeı kóredi. Al, qazylar alqasy qatysýshylardyń kórkem mátindi tańdaý jáne oqý sheberligine, qazaq tiliniń orfoepııalyq normalaryn saqtap, taza sóıleýine, án oryndaý sheberligine, kórermender aldynda ózin-ózin ustaý mádenıetine nazar aýdardy. Bas júldeni Marına Harchýk ıelendi.
Farıda Byqaı,
«Egemen Qazaqstan»
Pavlodar
