Aıtalyq, byltyr bir gektardan 14 sentner astyq jınalǵan. Al bıyl astyq ónimdiligi ár gektarynan 7-8 sentnerdi quraıdy. Atalǵan kórsetkish ortasha jyldyq normanyń sheginde bolyp otyr. Mol jańbyrdyń bolmaýy astyqtyń ósimine keri áserin tıgizgen.
Sondaı-aq, bıyl aımaqta kartop baǵasy sharyqtap ketken bolatyn. Nannan keıingi mańyzdy as sanalatyn ol ónimniń de qunyn qadaǵalap otyrý asa mańyzdy. Osy maqsatta Qaraǵandy oblysy bıylǵy jyly kartop óndirýshi sharýashylyqtar jınaǵan ónimderiniń bir bóligin rezervke saqtamaq.
Sonymen qatar, aımaq basshysy Erlan Qoshanovtyń tapsyrmasy boıynsha aýyl sharýashylyǵy basqarmasy kásiporyndarmen memorandým qurýdy kózdeıdi. Basty maqsat – kókónis ónimderiniń baǵasyn turaqty saqtap qalý. Nura aýdanyna jumys sapary barysynda oblys ákimi «Shahterskoe» JShS-niń kókónis qoımasyn qarap shyqty. Erlan Qoshanov memleket tarapynan qoldaý alyp otyrǵan aýylsharýashylyq ónimderin óndirýshilerge jaýapkershilik týraly eskertti. Kásiporyn jetekshisi Georgıı Prokop olardyń tarapynan qajetti mindettemeler oryndalatynyn jetkizdi.
– Keıbir kásiporyndar jınaǵan ónimderin syrtqa tolyqtaı satyp jiberedi. Biz óz aımaǵymyzdyń múddesin, oblys turǵyndarynyń jaǵdaıyn oılaýymyz qajet, – dep atap ótti Erlan Qoshanov.
Bıylǵy jyly oblysta 14 myń ga jerge kartop egilgen. Aımaqta bul kókónis túrin aýylsharýashylyq ónimin óndirýshi 38 kásiporyn ósiredi.
– Biz aýylsharýashylyq ónimderin óndirýshilermen ónimderiniń 5%-yn qorǵa saqtap qoıý týraly kelisim jasadyq. Sonan soń dúkenderde ol ónim turaqty baǵamen satylatyn bolady. Eki nusqa bar – tikeleı jáne turaqtandyrý qory arqyly. Qazirgi tańda sharýashylyqtardyń 60 paıyzymen memorandým qabyldandy. Jáne ol jumystar jalǵasýda, – dep habarlady oblystyq aýyl sharýashylyǵy basqarmasynyń basshysy Iýrjan Bekqojın.
Mıras ASAN,
«Egemen Qazaqstan»
Qaraǵandy oblysy,
Nura aýdany
