Munda ol kisiniń «Moskvıch» avtokóligi turatyn. Ákem qurylys isine sonshama tóselgen sheber adam emes edi. Sondyqtan da garajdyń aǵash esigin ornatqan kezde o basta qus erkin syıyp ketetindeı, ashyq qýys qalyp qoıypty. Bul joly sol qýystan qos qarlyǵash ushyp shyǵyp, ushyp kirip júrgenin kózim shaldy. Garajdyń ishine qarlyǵash uıa salyp, balapandaryna jem tasyp júr eken.
Arada tórt kún ótkende, qarlyǵashtar balapandaryn uıasynan shyǵaryp, ushýǵa baýlı bastady. Súp-súıkimdi aıyr quıryq qarlyǵashtyń balapandary alǵash ret qanatyn qaqqan sátine kýá boldym. Qaýyrsyn qanattary áli bekip úlgirmegen balapandar ushýǵa talpynyp kóteriledi de, qaıtadan jerge top etip qonady. Úı ıelerinen seskenbeıdi de, úrikpeıdi de. Bir kezde balapannyń bireýi ushyp kelip, men otyrǵan uzyn aǵash oryndyqtyń ústine qondy. Qolyma ustap: «Qarlyǵashym keldiń be?» – dep Muqaǵalı aqynsha ony erkeletip, qolyma ustap aıalaǵym keldi. Biraq tıispedim.
Bir kezde balapan taǵy bir ret talpynyp ushty da, teledıdar jelisiniń symyna qondy. Sál otyryp qaıtadan jerge qaraı quldılaı tómendedi. Anasy ony muqııat qadaǵalap júr. Ekinshi kúni qarlyǵash balapandarynyń kádimgideı shıryǵyp qalǵanyn baıqadym. Aldyńǵy kúngideı emes, qanattaryn batyl qaǵyp kókke qalyqtap usha bastady. О́mirden ótken ata-anamnyń qara shańyraǵynda inim turady. Ol eski garajdy buzatyn oıy bar ekenin aıtyp júretin. Mynandaı kórinisten keıin men oǵan: «garajǵa tıispe, oǵan qarlyǵash uıa salypty. Bul óte jaqsy qubylys. Qarlyǵashtyń uıasymen birge shańyraqqa qut-bereke, yrys qonady. Sony umytpa» dedim. Ol meni túsingendeı boldy. Ári garajdyń esiginiń qarlyǵash ushyp kirip, ushyp shyǵyp júrgen ashyq jerin sol qalpynda qaldyrýǵa ýádesin berdi. «Kelesi jyly taǵy da qarlyǵashtar osy qonysyna qaıtadan keledi», dedim men oǵan nyq senimmen.
Temir QUSAIYN,
«Egemen Qazaqstan»
AQTО́BE
