Aldyn ala málim etilgen aqparatta aıtylǵandaı, mártebeli jarysqa AQSh, Qyrǵyzstan, О́zbekstan, Ázerbaıjan, Túrkııa, Reseı, Tájikstan, Qytaı, Mońǵolııa, Aýǵanstan, Vengrııa jáne óz elimizdiń kókparshylary qatysyp, jarys kórigin qyzdyrýy tıis bolatyn.
Atap ótkenimizdeı, joǵaryda aty atalǵan memleketterdiń ishinen belgili sebepterge baılanysty Ázerbaıjan kókparshylary jarysqa kele almaı qaldy. Qalǵan 11 komandanyń balýandary jasyndaı jarqyldap, astyndaǵy attarynyń aýyzdyǵyn qarsh-qarsh shaınatyp alańǵa shyqty.
Budan bir aı buryn jerebe tartylyp, kókparshylardy eki topqa jiktep, anyqtap qoıǵan sheshim boıynsha, alǵashqy bolyp О́zbekstan men Tájikstan komandalary saıysty bastady. Nátıjesinde 3:0 esebimen tájikstandyq kókparshylar ózbek baýyrlardy tize búktirdi. Ekinshi bolyp alańǵa bettegen Túrkııa jáne AQSh eli quramalarynyń oıyny súreńsizdeý bolǵanymen, túrik baýyrlar 7:1 esebimen jeńis týyn kóterdi. Úshinshi saıys – Qazaqstan jáne Aýǵanstan komandalary arasynda órbidi. Aýǵan býzashylary (kókparshylary) álekedeı jalanǵan bizdiń jigitterge tıtteı de qarsylyq tanyta almady. Esep – 9:2. Tórtinshi jupqa túıisken Ázerbaıjan men Qytaı jigitteri alańǵa shyǵyp, at terletip sharshamady. Ázerbaıjan kókparshylary jarysqa kelmegendikten, jeńis qytaılyq kókpaqshylardyń qanjyǵasyna op-ońaı baılandy.
Kókpardyń sońǵy juby – Qyrzǵystan jáne mońǵol eliniń azamattary kórermenderge naǵyz saıysty kórsetti. Ásirese, astyndaǵy attary ústindegi balýannyń taqym qaǵysyn qalt jibermeı jattyqqan qyrǵyz jylqylarynyń keremet aıla-tásilin kórgen jurt ta, qarap otyrǵan biz de súısindik. Taýly jerde kókpar tartyp jattyqqan qyrǵyzdarǵa mońǵolııalyq azamattar ájeptáýir qarsylyq tanytty. Biraq nátıje – 4:0. Jeńis qyrǵyzstandyqtar enshisine buıyrdy.
Joǵarydaǵy bes kezdesýdi túıindep tastaǵan uıymdastyrýshylar kún ekintige taıaǵanda chempıonattyń resmı ashylý saltanatyn ótkizdi. Áýeli, dodany tamashalaýǵa jınalǵan nópir jurtqa jamby atý, teńge ilý, tazy jarystyrý sııaqty oıyndar kórsetilip, sońynda alys-jaqynnan at aryltyp kelgen kókparshylar sherýi ótti.
Alǵashqy bolyp sóz alǵan Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov buǵan deıin halqymyzdyń asyl murasy – ulttyq oıyn túrlerinen tek qana toǵyzqumalaqtan álemdik deńgeıde jarys ótkizilip kelgen bolsa, endi mine, qatarǵa kókpar qosyldy degendi atap ótip, jınalǵan jurt pen qazaq eline at basyn burǵan saıyskerlerge alǵysyn bildirdi.
Mártebeli meımandar atynan pikir aıtý baqyty AQSh-tyń Qazaqstandaǵy Tótenshe jáne ókiletti elshisi Djorj Krol myrzaǵa buıyryp, elshi óz tilegin kópshilikke qazaq tilinde jetkizdi. «EKSPO kórmesi aıasynda ótkizilip otyrǵan bul jarysqa amerıkalyqtardyń shaqyrylýy eki memleket arasyndaǵy jaqsy baılanystyń nátıjesi», dedi elshi myrza.
Saltanatty rásimniń sońy konserttik baǵdarlamaǵa jalǵasyp, elimizge tanymal óner juldyzdary óz ónerlerin pash etti.
Beken QAIRATULY,
«Egemen Qazaqstan»
