Búgin Germanııanyń Gambýrg qalasynda ótip jatqan Bokstan álem chempıonatynyń jartylaı fınaldyq básekesi bastaldy. Qazaqstandyq boksshylardan birinshi bolyp rıng tórine 49 kılodaǵy otandasymyz Jomart Erjan shyqty. Ol 2015 jylǵy álem chempıony kýbalyq Hoanıs Arhılagospen judyryqtasyp, upaı sany boıynsha ese jiberdi.
Jekpe-jek bastala sala Jomart Erjan shabýylǵa kóship, birinshi nómirmen jumys istedi. О́ıtkeni, boksta kóp jáne dóp soqqy jasamasań tóreshiler jeńisti qarsylasyńa berip jiberý múmkin. Al kýbalyq boksshy bolsa, qarsy shabýylǵa ıek artýmen boldy. Jomartyń sol qolynyń soqqylary Hoanıske anyq tıgenin aıta ketken jón. Ekinshi raýndta otandasymyzdyń basymdylyǵymen ótken bolatyn. Al úshinshi raýndta Jomart Erjan jyldamdyǵyn arttyryp, qarsylasyna qaraǵanda kóp soqqy jasaǵan edi, alaıda rıng shetindegi bes tóreshi de jeńisti kýbalyq boksshyǵa berdi. Qorytyndy esep – 0:5. Sóıtip, Jomart bokstan álem chempıonatynyń qola júldegeri atandy.
Aıta keteıik, Jomart Erjan qurama qorjynyna álem chempıonatyndaǵy alǵashqy júldeni saldy. Bul otandasymyz úshin úlken nátıje. О́ıtkeni, ol bıylǵy Azııa chempıonatynda úzdik altylyqqa enbeı, álem birinshiligine beriletin joldamadan qaǵylǵan bolatyn. Alaıda, saryqurlyq birinshiliginde altynshy oryn alǵan ındonezııalyq boksshy Kornelıýs Kvangý Langý lısenzııasynan bas tartyp, AIBA bul joldamany jetinshi orynda turǵan Jomart Erjanǵa bergen edi.
