Búgin bokstan Germanııanyń Gambýrg qalasynda ótip jatqan Bokstan álem chempıonatynyń jartylaı fınaldyq básekesi bastaldy. Qazaqstandyq boksshylardan úshinshi bolyp rıng tórine 75 kılodaǵy otandasymyz Amanqul Ábilhan shyqty. Ol 2016 jylǵy Rıo Olımpıadasynyń qola, Eýropa chempıonatynyń kúmis júldegeri ázerbaıjandyq boksshy Kamran Shahsývarlymen judyryqtasyp, upaı sany boıynsha basym tústi.
Qos boksshy birinshi raýndty bir-birin ańdysýmen bastady. Ekeýi de ashyq boksqa kirisken joq. Degenmen, Kamran Amanquldyń qorǵanysy ashyq qalǵanyn baıqap, 2-3 anyq soqqysyn daryta bildi. Al Ábilhan birinshi raýndta aıtarlyqtaı kózge túse almady.
Ekinshi raýndty otandasymyz esesi ketip jatqanyn ańǵaryp, shıraq qımyldap, anyq soqqy jasaýǵa tyrysyp baqty. Jáne de óz degenine jete aldy. Ázerbaıjandyq boksshynyń birneshe qatelikterin tıimdi paıdalanyp, birinshi raýndta ketken esesin qaıtardy.
Úshinshi raýndta da Amanqul erik-jigerin kórsetip, qarsylasynan bir bas joǵary ekenin dáldedi. Jekpe-jek qorytyndysy boıynsha Amanqul Ábilhan qarsylasyn aıqyn basymdyqpen utyp, álem chempıonatynyń fınalyna shyqty.
Aıta keteıik, Amanqul Ábilhan ázerbaıjandyq boksshydan otandasymyz Jánibek Álimhanulynyń ketken esesin qaıtardy. Jánibek Rıo Olımpıadasynyń shırek fınalynda dál osy boksshydan jeńilip qalǵan bolatyn.
