Sharaǵa Memlekettik hatshy, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova qatysty. Ashylý saltanatynda Memlekettik hatshy arýlardyń «jasyl energııa» óndirýdegi róline toqtaldy.
«Osy kólemdi sharany talantty ónertapqysh Ilon Masktiń «Bizdiń maqsatymyz álemniń energııany qoldanýyn túbegeıli ózgertýimiz kerek» degen sózimen bastaǵym kelip otyr. Búgingi tańda adamzat 4.0 ındýstrııasynyń transformasııalyq kezeńine aıaq basty. Tehnologııalyq ınnovasııa men sıfrlyq ónimderdiń damyǵandyǵynan, álemde qurylymdyq ózgerister bolyp jatyr. Olar «jasyl» ekonomıkany jahandyq deńgeıde túbirimen ózgertedi», dedi G.Ábdiqalyqova.
Memlekettik hatshynyń sózine súıensek, «jasyl» energııanyń damýyna áser etip otyrǵan álemdik bes úrdis bar. Áýeli, energııany jınaý men onyń qunynyń ósýi. Ekinshi, qarjylaı qoldaýdy ashyq túrde júrgizý. Kelesi baǵyt atalǵan salany damytýǵa arnalǵan saıası bastamalar. Klımat ózgerýine qatysty týyndaıtyn apattardyń aldyn alý – tórtinshi másele. Sońǵysy – damýshy elderdegi energııaǵa degen qajettiliktiń artýy.
Sonymen qatar, Memlekettik hatshy keleshekte energetıkaǵa degen suranystyń ózgerýine toqtaldy. Onyń aıtýynsha, 2050 jylǵa qaraı álemde «jasyl» energııa kózderine degen suranys ulǵaıady. Sondyqtan, ony óndiretin qurylǵylardyń baǵasy arzandaıdy.
«Taıaýda elimizdiń Energetıka mınıstrligi «Forsaıt-2050» Jańa álem energııasy jáne Qazaqstannyń sondaǵy orny» dep atalatyn zertteý júrgizip, 139 elden jınalǵan 6 mıllıonǵa jýyq derek taldandy. Onda 2050 jylǵa qaraı energııaǵa degen suranys 3 paıyzǵa azaıatyny aıtylǵan. Kómir tutyný kólemi 2 esege deıin azaıady. Al munaıǵa qajettilik kúnine 95 mıllıon barrelge deıin jetedi», dedi G.Ábdiqalyqova.
Jıynda sóz alǵan Syrtqy ister mınıstri Qaırat Ábdirahmanov názik jandylardy energetıka salasynda belsendi bolýǵa shaqyrdy. Onyń pikirinshe, arýlardyń «jasyl energııaǵa» aralasýy olardyń tıimdi bıznes-model qurýyna jaǵdaı jasaıdy. Mınıstr keıbir damýshy elderdiń «jasyl» energııa kózderine ótýine qarjy tapshy bolatynyna toqtaldy. Onyń aıtýynsha, qazirdiń ózinde 3 mıllıardqa jýyq adam ekologııalyq taza tehnologııany paıdalanbaıdy eken. Solardyń kóbi – názik jandy adamdar.
«Aýyldyq jerlerde áıelderdiń tutynýǵa qajetti energııaǵa ońaı qol jetkizýine jaǵdaı jasalýy tıis. Bul salaǵa názik jandylardyń qatysýy búkil deńgeıde júrýi kerek. Biz adamzattyń jartysyn quraıtyn áıel zaty belsendi áreket etetin energetıkalyq revolıýsııa jasaýymyz qajet. Prezıdent Nursultan Nazarbaev genderlik tepe-teńdikti, saıasatta, ekonomıkada jáne tehnologııalyq úderiste áıelder men erler arasyndaǵy teńdikti tolyq qoldaıdy. Búgingi forým arýlardyń barsha qıyndyqty jeńip, balamaly energııa kózine qoljetimdi bolýyna múmkindik jasap otyr. Álem boıynsha áıelder osy qozǵalystyń aldyńǵy qatarynda júr», dedi Q.Ábdirahmanov.
Sonymen qatar, shara aıasynda Memlekettik hatshy sheteldik resmı delegasııalar men halyqaralyq uıymdar basshylarymen ekijaqty kezdesýler ótkizip, «jasyl» ekonomıkadaǵy jáne balamaly energetıkadaǵy áıelderdiń múmkindikterin keńeıtý salasyndaǵy qarym-qatynasty damytý perspektıvalaryn talqylady.
Forým jumysyna álemniń 25 elinen 300-den astam delegat keldi. Olardyń arasynda Reseı Federaldy jınalysy Federasııa keńesi tóraıymynyń orynbasary Galına Karelova, Belarýs Prezıdenti ákimshiliginiń basshysy Natalıa Kochanova, Jahandyq áıelder sammıtiniń prezıdenti Iren Natıvıdad, О́nertapqysh jáne kásipker áıelderdiń dúnıejúzilik qaýymdastyǵynyń prezıdenti Mı-Iong-Han sekildi birqatar tanymal tulǵalar bar.
Is-shara qorytyndysy boıynsha, álemdik qoǵamdastyqty qorshaǵan ortaǵa qysymdy tómendetýge, klımattyq ózgeris jáne tabıǵat resýrstarynyń azaıýyn báseńdetý jónindegi halyqaralyq qaǵıdalardy saqtaýǵa shaqyrǵan, «jasyl» ekonomıkaǵa kóshý isin jedeldetip, halyqtyń ál-aýqatyn arttyrýǵa septigin tıgizetin qarar qabyldandy.
Jıynnan keıin arnaıy shaqyrylǵan meımandar EKSPO-2017 kórmesiniń pavılondaryn, Astana qalasynyń kórikti jerlerin aralap, Ulttyq mýzeıge, «Astana Opera» teatryna barady.
Abaı Asankeldiuly,
«Egemen Qazaqstan»
