Kórmede Qyrǵyzstannyń ulttyq kúni merekelendi

Qazirgi tańda kórshiles memlekette 2018-2040 jyldarǵa arnalǵan strategııalyq jobalar negizinde turaqty damýdyń ulttyq strategııasy ázirlenýde. Jańa qujatqa sáıkes memleket aldynda negizgi úsh maqsat bar: halyqtyń ekonomıkalyq ál-aýqaty, áleýmettik aman­dy­ǵy, azamattardyń qaýipsiz jáne qolaıly ortasy. Bul týraly sharanyń resmı bó­liminde qyrǵyz eliniń vıse-premeri Cholpan Sýl­tanbekova málimdedi. Ol ja­han­dyq jylyný oryn alǵan za­manda «Bolashaq energııa­sy» taqyrybyn tý etken Asta­nadaǵy kórmeniń mańyzy zor ekenin de tilge tıek etti. 

«Qazaqstannyń 2012 jy­ly EKSPO-2017 kórmesin ót­kizýge degen ótiniminiń jeńisi mem­lekettiń halyqaralyq jo­ǵary bedeliniń taǵy bir dáleli boldy. Ekologııanyń zııandy sal­darynan qutylý úshin jań­ǵyrmaly energetıkany damytýymyz qajet. Kórme aıasynda ozyq tájirıbemen almasýdyń jáne jańǵyrmaly energııa kózderin qoldaný salasynda yntymaqtastyq ornatýdyń mańyzy zor dep oılaımyn. Qyrǵyzstan energetıkanyń turaqty damýy úshin mem­lekettik qoldaý boıynsha álemdik baǵytty qoldaıdy. 

Energetıka – halyqtyń ómir súrý deńgeıine jáne eko­nomıkanyń barlyq sektorlaryna tikeleı áser etetin stra­tegııalyq sala. Bizdiń memle­ketimizde atalǵan sala IJО́ 2 paıyz jáne ónerkásiptik óndiristiń 16 paıyz, respýblıkalyq bıýd­jettiń 10 paıyz kirisin quraı­dy», dedi Qyrǵyzstan vıse-premeri. 

Qazaqstan tarapynan sóz sóılegen Ulttyq ekonomıka mınıstri Tımýr Súleımenov memleketter arasyndaǵy dostyq qarym-qatynas ózara qurmet pen qyzyǵýshylyqqa negizdelgenin jáne Qyrǵyzstannyń EKSPO-2017 kórmesine qaty­sýy onyń aıqyn dáleli ekenin atap ótti. «Eki el arasynda joǵary deńgeıde kelissózder men túrli jıyndar júrgizilýde. Qyrǵyzstannyń ulttyq pavılonyn qurýda aıtarlyqtaı ju­mystar atqarylǵandyǵy aıqyn. Qazaqstan Úkimeti atynan jáne jeke óz atymnan Qyrǵystanǵa qoldaý kórsetkeni úshin jáne Astana qalasyndaǵy EKSPO-2017 halyqaralyq maman­dandyrylǵan kórmesine qatysqany úshin alǵysymdy bildiremin», dedi mınıstr. 

Qyrǵyzstan pavılony Jibek joly plazasynda usy­nylǵan. Pavılondaǵy ınteraktıvti ekspozısııalar kórme kelýshilerine memleket týraly aqparat beredi. Sondaı-aq, eldiń eksporttyq áleýetin damytýǵa, energetıkalyq qaýip­sizdikpen qamtamasyz etýge baǵyttalǵan jobalar men sý energetıkasy salalaryndaǵy jetistikterimen tanystyrady.