Áıelder kásipkerliginiń damýy elimizdiń jalpy iskerlik ahýalymen tyǵyz baılanysty. Bul elimizdegi shaǵyn jáne orta kásipkerliktegi áıelder úlesiniń artýymen dáleldengen. Búgingi tańda elde orta eseppen shaǵyn jáne orta kásipkerlik sýbektileriniń 42 paıyzy barlyq jumys oryndarynyń 30 paıyzdan astamyn qamtamasyz etetin áıelderdiń enshisinde. Al áıelderdiń eldegi IJО́-ge qosqan úlesi shamamen 40 paıyzdy quraıdy. Endi jastar kásipkerligin damytýǵa ekpin túsip otyr.
Qyzdar men jas áıelder ózderiniń múmkindikterin kásipkerlikte yntalana iske asyrady. Alaıda, olarǵa naqty qoldaý men kómek kerek. Osyǵan baılanysty Qazaqstannyń isker áıelder qaýymdastyǵy búkil el boıynsha «Jas qanattar» atty bólim qurdy. Oǵan 18-den 35 jasqa deıingi, jańadan 6 aıdan 2 jyl aralyǵynda kásipkerlikpen aınalysqan jas qyzdar men áıelder kirdi. Búginde «Jas qanattar» quramyna 200-den astam kásipker qosylǵan.
Qazaqstan isker áıelder qaýymdastyǵy óz qanatynyń astyna elimizdegi eń myqty, eń úzdik, eń ádemi qyzdardy jınap otyr. Judyryqtaı jumylsaq, qashanda ońaı, qaýipsiz ári senimdi. Biz erekshe kezeńde, erkin elde ómir súrip jatyrmyz. Biz – joǵary bilimdi qazaqstandyq qoǵamnyń bir bóligimiz. Árqaısymyz saıasatta, bızneste, ǵylymda bıik jetistikke jete alamyz, dedi senator. Osy oraıda ol búginde názik jandylar erlerden esh qalyspaı, óz isterin jaýapkershilikpen óte jaqsy atqaryp júrgenin sóz etti.
Qaýymdastyqtyń «Jas qanatyn» ashý – der kezinde qolǵa alynǵan shara. Shyn máninde, búginde jastardan úırenerimiz kóp. «Jas qanattar» eresekterge sońǵy úlgidegi sıfrly tehnologııalarda bilimderin úıretip, deldaldar men qajetsiz shyǵyndardy aınalyp ótý arqyly bıznes júrgizýge kómektesedi dep úmittenemin. Múldem basqa ortada ósken kásipkerlerdiń jas býyny jetilip kele jatyr. Bul balalar ınternet jáne sıfrly tehnologııalar dáýirinde tálim alǵan jáne bıznes júrgizýde olardyń kózqarasy ózgeshe. Búginde áleýmettik jeliler de bıznes júrgizýge jaqsy jaǵdaı jasady. Buryn mundaı múmkindik bolmaǵan, dedi D.Nazarbaeva.
Senator sondaı-aq, stýdentterge arnalǵan úzdik bıznes jobalarǵa baıqaýlar ótkizý kerektigin atap ótti. Osy maqsatta joǵary synyp oqýshylary men kolledj stýdentteri úshin kásipkerlik negizi boıynsha oqý baǵdarlamalaryn engizý kerek. Mektep pen stýdenttik komandalar arasyndaǵy jeńimpazdardy anyqtap, úzdik bıznes jobalardy iske asyrý úshin granttar bólgen durys.
Dınara BITIK,
«Egemen Qazaqstan»
