Oblys ortalyǵyndaǵy qalalyq saıabaqta etnomádenı birlestikter arasyndaǵy «Bir shańyraq aıasynda» atty festıval qalyptasqan dástúr boıynsha jyl saıyn ótkiziledi. Bıyl Assambleıanyń jergilikti fılıaly bul festıvaldi EKSPO-2017 kórmesine arnady. Festıvalde chývash etno-mádenı birlestigi óz ónerlerin kórsetti. Birlestik 20 jyl boıy el birligin saqtaýda qyzmet etip keledi. Oblysqa tanymal «Sespel» chývash folklorlyq ansambli halyq ánderi men bılerin oryndady. Qalalyq saıabaqqa jınalǵan turǵyndar chývash halqynyń ánderin tyńdap, mádenıetimen, ulttyq taǵamdarymen jáne salt-dástúrlerimen tanysty. Sondaı-aq, qazaq jáne orys ánderi de shyrqaldy. Folklorlyq ansambl Cheboksaryda ótken jalpyreseılik «Rodnıkı Povoljıa» festıvalinde laýreat atanǵan eken.
Merekege jınalǵan jurtshylyq chývashtardyń dámdi bálishterinen de aýyz tıdi. Etno-mádenı birlestiktiń basshysy Elena Safronovanyń aıtýynsha, jalpy chývash tili osydan on jyldaı ýaqyt buryn «Qyzyl kitapqa» enipti. Oblysta ótetin osyndaı merekelerde ulttyq folklorlyq ansambl jastardyń óz halqynyń salt-dástúrin, án-bılerin, ana tilin umytpaýlary úshin qajet.
Assambleıada til úıretý úıirmeleri jumys isteıdi. Bul maqsatty oıdy Chývashııadan kelgen ulttyq kongress múshesi V.Fedotov quttyqtaý sózinde de atap ótti. Búginde óńirde 700-ge jýyq chývash turady. Az bolsa da birligi men tirligi jarasqan, túrkitildes baýyrlastar Qazaq jerin otanyndaı kórip, ulttyq qundylyqtaryn saqtap, týǵan tilderin jańǵyrtyp keledi.
Farıda BYQAI,
«Egemen Qazaqstan»
Foto: Maqsat AITBAEV
Pavlodar oblysy
