Búgin bokstan Germanııanyń Gambýrg qalasynda ótip jatqan álem chempıonatynyń jartylaı fınaldyq básekesiniń ekinshi kúni bastaldy. Keshegi jarys kúninde tórt boksshymyz sharshy alańǵa shyǵyp, Qaırat Erálıev (56 kg) pen Amanqul Ábilhan (75 kg) fınaldyq aıqasqa ótken bolatyn.
Jartylaı fınaldyń ekinshi kúninde 69 kılodaǵy otandasymyz Abylaıhan Júsipov 2016 jylǵy Rıo Olımpıadasynyń kúmis júldegeri, 2017 jylǵy Azııa chempıony ózbekstandyq boksshy Shahram Gııasovpen judyryqtasyp, upaı sany boıynsha ese jiberdi. Qos boksshy jarty jylda ekinshi ret kezdesti.
Bir-birine jaqsy tanys kóne qarsylastar alǵashqy raýndty óte saqtyqpen bastady. Ekeýi de qorǵanysqa asa qatty kóńil bólip, reti kelgende shabýyldap jatty. Degenmen, Abylaıhan birinshi raýndta qarsylasyna qaraǵanda anyq soqqylarymen kózge túse bildi.
Ekinshi raýndta da boksshylar ózderine ońtaıly sátti kútip, ara-arasynda soqqy jasaýmen boldy. Úshinshi raýndta otandasymyz qarsylasyna qaraǵanda shıraq qımyldap, anyq soqqy jasaǵan bolatyn. Alaıda, tóreshiler jeńisti kýbalyq boksshyǵa berdi. Esep – 1:4.
Aıta keteıik, Abylaıhan úshin bul Gııasovtan Azııa birinshiliginiń fınalynda ketken esesin qaıtarýǵa tamasha múmkindik bolǵan edi. Alaıda, Júsipov bul joly da Shahramnan aılasyn asyra almady.
