Áýezovtiń dombyrasy. Birden birge aýysyp, búgingi kúnge qalaısha jetken edi?

Ǵulama Áýezovtiń tilimen aıt­qanda, «án óneriniń ǵana emes, adamgershiliktiń akademıgi» atanǵan Júsekeń, áıgili ánshi Júsipbek Elebekov shákirtten kende bolmaǵan kisi. Nebári qyryq úsh jasynda qapııada ómirden ozyp, sodan beride shırek ǵasyr ótken jan-jaqty talant ıesi Jánibek Kármenov sonyń biri ǵana emes, biregeıi bolatyn. Sonaý 1966 jyly Júsekeń ony Abaı eliniń amanatymen qasıetti Qaraýyldan qasyna ilestirip Almatyǵa ala ketkende, Jánibek bar bolǵany on jeti jasta edi.

Osy jasynda ol jaqsy aǵanyń qam­qor­lyǵymen «Qazaqkonsert» syndy res­­pýb­lıkalyq úlken óner ordasyna qyz­metke turǵan. Sodan týra bir jyl boıy ulaǵatty ustazymen muqym qazaq saharasyn óner saparymen aralap shyq­ty. Arǵyda Mádı, bergide Abaıdyń án­shisi Álmaǵambet, al odan keıingi jerde Ámire syndy án dúldúlderinen sabaq al­ǵan ustazynyń ánshiliginde qapy joq eken­digin elgezek Jánibek sol shaqta jas bolsa da esh­kim­ge aıtqyzbaı-aq túsingen.

...Qarqaraly saparynan soń ustazy men shákirti ol jaqtan Abyraly-Qaınar arqyly Shyńǵystaýǵa, Abaı eline kelgen. Ǵulama Áýezovtiń «Abaı joly» syndy kesek te kemel shyǵarmasy «úsh kúndik joldyń búgingi, sońǵy kúnine bala shákirt baryn saldy» dep bastalmaýshy ma edi?! Sol sııaqty Shyńǵystaýdyń tóbesi kóringenshe Jánibekten de maza ketken. Úlken basymen Qarqaralyǵa jetkenshe degbiri qalmaǵan ustazy munyń kóńil kúıin aıtqyzbaı-aq tanyp keledi. «Tań atpaımyn dese de, kún qoımaıdy» demekshi, aqyry Qaraýylǵa da kelip jetti-aý bular.

Ertesinde bular Muhańnyń, Áýezovtiń osy eldegi birden-bir dosy Baltaqaı aqsaqaldyń úıinde qonaq bolǵan. Muhań soǵystan keıin ile-shala ótken Abaıdyń júz jyldyq toıynan soń osy dosynyń jeti jasar Manataı degen ulyn Almatyǵa ilestire ózimen alyp ketken-di. Bul kúnde sol Muhtar dosy joq bolǵanmen, onyń eldegi kózi ispettes adamǵa Júsekeńniń de qurmet-iltıpaty erekshe bolyp shyqty. О́ıtkeni ekeýine ortaq áńgime jetip artylatyn. Muhań syndy ortaq tulǵa týraly sóz arasynda ánshiniń bul jaqqa kelgen saıyn Baltekeńniń úıine soǵyp, ánmen sýsyndatpaı ketpeıtini de aıtylmaı qalmady. Úı ıesi sol burynǵy daǵdysymen qonaqkáde retinde án aıtyp berýin suraǵanda Júsekeń:

 – Men osy jaqqa kelgen saıyn sen jastyq shaǵyńdy eske túsirgiń kelip, maǵan «Jambas sıpardy», «Ǵalııany», «Jıyrma besti» aıtshy dep maza bermeýshi ediń. Myna Jánibektiń boıynda asqan ánshilik óner, daryn bar. Jón bizden bolǵanda, jol osy jastardiki. Endeshe Jánibekti tyńdaıyq. Álgi Muhańnan alǵan sheshen dombyrań bar edi ǵoı, sony ákel, – dedi.

Jánibek bolsa, bastapqyda azdap qobaljyǵanmen, boıyn tez jınap alyp, álginde tilge tıek bolǵan «Jambas sıpardy» shyrqata saldy. Odan keıin ádetinshe Abaı ánderin birinen keıin birin oryndady. Biriniń jasy alpysty ortalap, ekinshisiniń jasy jetpiske kelgen eki aqsaqal beıne jastyq shaqtaryna qaıtyp oralǵandaı jaqsy áserden birden aıyǵa almaı otyryp qaldy. Sonsoń baryp Baltekeń «shákirtsiz ustaz – tul» deı kelip, eń aldymen, alǵysty Júsekeńe aıt­ty. As ústinde de ánshilik tóńireginde qyzyq­ty áńgimeler qozǵaldy. Al as qaıy­rylyp, dastarqanǵa bata jasalǵan soń bir áýlettiń ǵana emes, ulylar eliniń ula­ǵatt­y aqsaqaly, súıegi jaǵynan uly aqyn­men týys bolyp keletin jaqsy aǵa keıin­gi tolqyn ókiline tosyn syı jasady. Iаǵnı, soǵystan keıin Almatydaǵy bir aıtýly sheberge bul úshin arnaıy jasat­qan dombyrany «Jaratqan saǵan Muhań men Júsekeńniń ataq-abyroıyn ber­sin» deı kelip, Jánibekke syıǵa tartty. Bu­ǵan shákirtimen birge, ustazy da dán rıza boldy.

Al Baltaqaı aqsaqal arqyly Jáni­be­k­tiń qolyna tıgen uly tulǵa jasatqan dombyranyń arǵy mándi tarıhy týraly alda aıta jatarmyz. Almatyǵa osydan bir jyl buryn ǵana artyna qaraılap, jaltaqtap attanǵan jas jetkinshek osy joly mereıi tasyp, zor qýanyshpen attanyp bara jatty. Sony týys-týǵandary, basqa da janashyrlary qaltqysyz túsinip, ıgi tilektestikpen qala bergen. Jas ánshi tek osy bir Qarqaraly, Abyraly, Shyń­ǵy­staý saparynda jańadan onshaqty án úıre­nip qaıtqan eken. Jalpy, Jánibek Júse­keńniń janynda bolǵan 10-15 jylda usta­zy­nan 350-400-deı án úırenipti desedi biletinder.

* * *

Jánibek bir jylǵa sozylǵan osy sapardan soń, naqtylap aıtqanda, 1967 jyly oqýǵa qabyldanǵan óner ordasy sodan eki jyl buryn estrada-sırk óneriniń respýblıkalyq stýdııa-sheberhana­sy retinde qurylǵan eken. Dástúrli án óneri­niń aıtýly ánshileri Júsipbek Ele­bekov pen Ǵarıfolla Qurmanǵalıev atal­mysh oqý ornyna bular oqýǵa qabyl­danǵan jy­ly ustaz bolyp qyzmetke turady.

Stýdııadaǵy oqý men jastyqtyń jarqyn shaqtary kezek almasyp, ýaqyt syrǵyp ótip jatady. Jánibek buǵan deıin bir jyl Júsekeńniń janynda bolyp, kóptegen ánderdiń shyǵý tarıhyn, oryndaý mánerin úırenip qalǵanymen, ózi qudaıdaı tabynyp syılaıtyn úlken kisini ustazdyq qyrynan qaıta tanı túsken. Sóıtse ónerge boıyńdaǵy talantpen birge, erinbeı eńbektený, uqyptylyq pen tııanaqtylyq ta qajet eken. Ustaz Júsipbek burynǵy burynǵy ma, endigi jerde tym talapshyl bolyp aldy.

Sóıtip júrgende kún artynan kún ótip, aı jańardy. Aı jańaryp, jyl almasty. Solaısha Jánibekter úshin stýdııadaǵy ekinshi, sońǵy jyl da bastalyp ketken. «Týǵan aı týraǵan etpen teń» degendeı, bul jyl da syrǵyp ótip jatqan. Sondaı kúnderdiń bir kúninde Júsipbek ustazdary shákirtterine sál naýqastanyp júrgenin tilge tıek ete kelip, emdelý maqsatymen shıpajaıǵa ketip bara jatqanyn aıtqan. Bárinen de buryn buǵan, Jánibekke «men qaıtyp oralǵansha myna kógenkózderge óziń baskóz bol» degen maǵynada jaýapty tapsyrma júktep ketkenin qaıtersiz! Biraq, ókinishke qaraı, osy tusta ómirdiń buǵan ázirlep qoıǵan ájeptáýir salmaqty synaǵy bar bolyp shyqty. Ańyz-ertegige bergisiz ol oqıǵa bylaısha sátsiz bastalyp, bylaısha baıandy aıaqtalǵan edi.

Bir kúni bulardyń jataqhanasyna Jánibekti izdep Qazaq memlekettik ýnı­ver­sıtetiniń stýdentteri, satırık aqyn Qajytaı Ilııasov pen talapker jas jazýshy Ǵalym Áshirbaev kele qalady. Ekeýi de Semeı jaǵynyń azamattary.

Jerlesteri artynan arnaıy izdep kelgende qazaqy minezdi Jánibek qaıtip shydasyn, bulardyń «birer án tyńdap qaıtyp ketemiz» degenine qaramaı, qasynda bir bólmede jatatyn Qaırat (Baıbosynov) pen Kenjeǵalı esimdi jigitterdi dúkenge júgirtip jiberedi. «Tis shaıar» men «tiske basardy» alǵan olar da kóp kúttirmeı oralady. «Sen ishpeýshi ediń ǵoı», – deıdi Qajekeń jasy kishi inisi ispettes Jáni­bekke. «Buryn sizben san márte kezdeskende bul shirkindi aýzyma almaǵanym ras edi, biraq osy joly mynanyń dámin sizdermen birge kórýge ańsarym aýyp turǵany», deıdi inisi. Qajekeń jasy úlken bolǵan soń munyń arty qalaı bolar eken dep áli de saqtanýmen bolady.

Otyrys qyzǵan kezde bólmege eńge­zer­deı kesek kelbetti qara áıel kirip keldi deıdi. «Bul ne?» deıdi ol eshkimnen de yqpaı qumyraǵa qol soza bergen Jáni­bekke. Sonda Ǵalym qonaq tapqyrlyq tanytyp: «Apaı, biz qurylysshy jigitter edik. Búgin qolymyzǵa tıyn-teben ilikken soń myna jerles inimizdi izdep kelgen jaıymyz bar. Qazir ketkeli otyrmyz»,  dep kútpegen keleńsiz jaǵdaıdan amaldap shyǵyp ketýdi oılastyra bastaıdy. Biraq oǵan Jánibek kónetin yńǵaı tanytpaıdy. Kóngeniń ne: «Mynaý qonaq, mynaý tamaq, al biz ne búldirip qoıyppyz», dep salady. «Baqsaq baqa eken» demekshi, bul kisi ýchılıshe dırektorynyń ózi bolyp shyǵady. Al Jánibektiń yldılap, ymyraǵa kelýdi oılamaı, kerisinshe órge qarsy shapqany óktem de órkókirek úl­ken bastyǵymen burynnan til tabysa almaǵan­dyǵynan bolsa kerek.

Osyny ózi de burynnan kútip júr­gendeı bildeı bir oqý ornynyń basshy­sy shart ketedi. Al onyń sońy Jánibek­tiń oqýdan shyǵarylýymen aıaqtalady. Eshqan­daı jazyǵy joq Qaırat bolsa kúı syny­byna aýystyrylady. Bul keleńsiz oqıǵa Jánibekpen birge, onyń ustazyna da beıne tóbesinen jaı túskendeı ońaı soq­papty. Ony Habıba apaıdyń shákirt pen onyń ustazy týraly esteligi rastaıdy.

«1969 jyldyń qańtar aıynda Júsip­bek syrqattanyp júrdi de, ruqsat alyp kýrortqa ketti. Saýyǵyp qaıtty. Kóńilimiz kóterildi. Kele sala sabaǵyna kirisken. Tús mezgilinde oralyp edi. О́ńi synyq, renjýli eken. Esikten kire: «Álgi Jánibek aýylyna qaıtyp ketipti. Bas­shy­­lardan surasam, daýsy ornyqpaǵan ótkinshi dep ana Qaıratty da kúı klasyna aýystyrý kerek dep shirenedi. Qudaı-aý, bularǵa ne aıtasyń», dep kúızelip, oryndyqqa otyra ketti.

Habıba apa budan áride Júsekeńniń sol kúni keshte Ishki ister mınıstri, general Shyraqbek Qabylbaevqa osy keleń­siz jaıtty baıandap telefon shalǵanyn, al mınıstr bolsa Jánibekti ózderin­de jańadan ashylyp jatqan ansamblge aldyrtýǵa ýáde etkenin aıtady.

Odan arǵy áńgimeni bizdiń ótinishimizge oraı keıipkerimizdiń qudaı qosqan qosaǵy Toty bylaısha jalǵastyrady.

«Qańtar aıynda oqýdan shyǵarylǵan Jánibek odan keıingi jerde munda bos júrip almaı eline qaıtyp ketipti. Sodan elge barysymen kóp uzamaı aýdan­dyq mádenıet bólimine avtoklýb meń­gerýshisi bolyp qyzmetke ornalasypty. Sodan naýryzdyń jıyrma biri kúni Qasqabulaqta malshylarǵa konsert berip bolyp jatar ornyna qaıtyp kele jatqanda eki mılısııa qolyn qaıyryp, áı-shaıǵa qaratpastan ala jónelipti deıdi. Muny estigen el bolsa eshteńege túsinbeı ańyryp otyryp qalady. Qaısybireýler «e, astanada birdeńeni búldirgen ǵoı» deıdi ózinshe bilgishsinip.

Organ qyzmetkerleri muny aldymen Qaraýylǵa, odan keıin shaǵyn ushaqpen oblys ortalyǵy Semeıge jetkizedi. Osy habardy artynan estigen anasy ańyrap qala beredi. Abaılyq mılısııa ókilderi «qylmyskerdi» Semeıge jetkizgen soń sondaǵy áriptesterine tabystaıdy. Al olar bolsa ústine tulyp, aıaǵyna pıma kıgen muny aınaldyrǵan bir táýliktiń ishinde mınıstrdiń aldyna jetkizedi. Sóıtse munyń bári generaldyń arnaıy tapsyrmasy boıynsha júzege asyrylǵan eken ǵoı. «Sóıtip, meni mınıstrge kirgizdi. Boıy eńgezerdeı general «bala, qalaı jettiń» dep halimdi suraı bastaǵanda ishim jylyp sala berdi deıtin keıinde Jánibek. Sodan keıin mınıstr óziniń birinshi orynbasary, general A.Tumarbekovti shaqyryp, muny mınıstrliktiń jańadan qurylyp jatqan ansambline 150 som jalaqymen ánshi-solıst etip qabyldaý jóninde buıryq ázirleýdi tapsyrady. Odan keıin basqa knopkany basyp, basqa qyzmetkerlerin shaqyryp, olarǵa buǵan arnalǵan kıim men páter kiltin alǵyzady. As úıi ortaq eki bólmeli páterge kereýet, taza júnnen jasalǵan odeıal, munyń syr­tynda ydys-aıaqqa deıin ázirletip qo­ıypty. Al ertesinde, ıaǵnı 22-naýryz kúni, óziniń qujat boıynsha týǵan kúninde Jánibek shyt jańa mılısııa for­masymen, «sý jańa» qyzmetke kirisip ketedi».

Sol 1969 jyldyń kúzinde Júsekeń shákirtine telefon shalyp, jaqyn kún­der­diń birinde respýblıka basshysy Din­muhamed Ahmetuly Qonaevtyń aldynda án salatyndyqtaryn, sondyqtan osyndaı jaýapty júzdesýge muqııat daıyndala berýi kerektigin eskertedi. Sóıtse Dımekeń sonyń aldynda munyń ustazyna: «Júseke, siz bir talantty shákirtti tárbıelep jatyr dep estidim. Jaqsyny kórmekke degen. Ol jigittiń ánin qashan tyńdaımyz?», dese kerek. Sodan reti kelip, sáti túskende mınıstr Qabylbaev úlken kisini jáne respýblıka Mınıstrler Keńesiniń tóraǵasy Báıken Áshimov báıbishelerimen óziniń taý jaqtaǵy saıajaıyna qonaqqa shaqyrmaı ma!

«Men ruqsatpen syıly qonaqtar otyr­­­ǵan bólmege kirgende Dımash Ahmet­uly tere­zeniń aldynda temeki tartyp túre­­gep tur eken dep eske alatyn keıinde Jákeń. Daýsymdy sozyńqyrap úlken kisi­lerge «Assalaýmaǵaleıkým» dep sálem berdim. Dımekeń meniń sálemime musyl­man jónimen jaýap qatty. Sonsoń azdy-kópti aman-saýlyqtan soń qandaı joǵary oqý ornynda oqıtynymdy surady. Biraq meniń stýdııany oqyp bitirdim dege­nime sonsha qanaǵattana qoımady bilem: «Kelesi kezdeskenimizde osyndaǵy joǵa­ry oqý oryndarynyń birinde oqyp jat­qa­nyń­dy estıtin bolaıyn», – dedi.

Sonsoń Júsekeńnen keıin men de úsh-tórt án oryndadym. Úlken jeńgemniń qurmetine oraı tatarsha da bir án aıttym. Dımekeń men Aqan seriniń «Qulagerine» qamshyny basqanda maǵan solaı kórindi me, bilmeımin, áıteýir eleńdep qalǵan sekildi kórindi. Sol ásermen jaǵdaıym­dy surady. Úlken kisiniń suraǵyna oraı malshynyń balasy ekenimdi, ákemniń bala kezimde dúnıeden ozǵanyn, sheshem, qaryndastarym bárimizdiń shaǵyndaý úıde turyp jatqanymdy aıttym. Sol kezde mınıstr sózge aralasyp, Dımekeńe osy shaǵyn úıde onshaqty jan tura­tynyn málim etti. Ol kisiniń bizdiń jaǵdaıymyzdy bilip turǵany mynada. Iаǵnı, elden anam kóship kelgen soń, mınıstr basymen bizdiń úıge kelip, qarııaǵa sálem berip shyqqan edi. Bizdi tyń­dap bolǵan soń birinshi hatshy general­dan mınıstrliktegi bos baspana jaǵ­daıyn surastyrdy. «Meniń orynbasarym, general Kalıýtanyń balasyna dep Vıno­gradov pen Karl Marks kósheleriniń qıy­lysyndaǵy úıden daıyndap qoıǵan úsh ból­meli páter bar edi», dedi mınıstr kúmil­jińkirep. «General balasyna úıdi taba jatar. Sol páterdi qoıshynyń mynadaı ónerli balasyna berińizder», dedi respýblıka basshysy.

Dımekeń sóz arasynda erterekte arǵy atalarynyń Shyńǵystaý jaǵyn jaılap kelgenin, al odan bergide ózderiniń Muhańmen quda bolǵanyn tilge tıek ete kelip, shyǵarmashylyǵyn ózderińiz de bilesizder ǵoı degendeı, qudasynyń adamı qasıetterine toqtala ketken. Sonsoń otyzynshy jyldardaǵy zulmatta Muhtar Áýezov pen Álimhan Ermekov syndy sol shaqtaǵy jas qyrandar jaqsy aǵalarynyń aqylymen aman qalǵan ǵoı dep qaldy. Odan áride Ermekovtiń Lenınniń óziniń kózin kórgenin jetkize otyryp, qazaq saharasynyń tutastyǵyn saqtap qalýdaǵy janqııarlyq qaıraty men aqyl-oıynyń tereńdigi jóninde aıta ketýdi de umytpaǵan. Osy tusta Júsekeń Dıme­keńniń Mınıstrler Keńesiniń tóraǵasy bolyp turǵan shaǵynda aıdaýdan endi oralǵan Álimhandy úı-jaımen qam­tamasyz etýge qolushyn bergenine rıza­shylyq bildirýdi óz boryshym dep bilgen.

Sodan bular Qonaev syılaǵan álgi úıge týra jańa jyldyń aldynda, naqtylap aıtqanda, 31-jeltoqsan kúni kelip kiredi. Aýmaǵy atshaptyrym dańǵaradaı úıge bes kereýet qoıylady. Al sapaly aǵash­­tan jasalǵan sheteldik ústel men oryn­­­dyq­tardy ustazy Júsekeń men ol kisi­niń báıbishesi Habıba apa bularǵa syı retin­de ala keledi. Ile Jánibektiń týysy, ope­ra teatrynyń solıst-ánshisi Músi­lim Asyl­bekov te jubaıymen jetedi. Bári­nen de bu­ryn osyndaı asyǵystaý ótip jat­qan qonys toıyna úlken basymen general Qabyl­baevtyń arnaıy kelgenin aıtsa­ńyz­shy! Ne kerek, sol kúni jaqsy tilekter moly­nan aıtylyp, áserli ánder de ustaz ben sháki­rt tarapynan birazǵa deıin shyrqalǵan tárizdi.

Qonys toıynyń sońyn ala osy shańy­raq­tyń jas ta bolsa basy bolyp tabyla­tyn Jánibek sóz alyp, áı bir aǵyldy deı­siń! «Kish­kene shal» sonda aqsaqaldyń sózin aıt­ty, oraıyn tamasha keltire otyryp mınıstr-generalǵa tosyn syı usyndy. «My­­na dombyra uly Muhańnyń ulylar elin­­degi bir-birinen alysta júrse de ara­sy ajy­ra­maǵan bala kezden bergi jan do­sy Bal­taqaı aǵaǵa arnaıy jasatyp berip jiber­gen syıy bolatyn. Al ony jaq­sy aǵa­myz aldyńǵy jyly ustazym­nyń kózin­she maǵan syılap edi. Aǵa, siz mılı­sııanyń generaly bolsańyz, Áýezov áde­bıet­tiń gene­­raly emes pe! Sondyqtan men bul dom­by­rany sizge laıyq kórip otyrmyn. Qolym­dy qaq­pańyz, qabyl alyńyz!» Gene­ral áskerı tár­tiptiń adamy bolsa da, órim­deı jas­tyń my­na sózine tolqyp ketti. Al artyq da­q­pyrt sózge joq ustazy bolsa «jón sóz» dep qaldy.

Sóz oraıyna qaraı endi sol domby­ranyń keıingi tarıhyn baıandaı ketsek deımiz. 2016 jyldyń onynshy aıy­nyń onynshy juldyzynda el gazeti «Egemende» áriptesimiz, atalmysh basy­lymnyń Qos­tanaı oblysy boıynsha tilshisi Názıra Járim­bettiń «Muhtar Áýezovtiń dombyrasy qostanaılyqtarǵa qalaı jetti?» degen taqyryppen kólemdi de mazmundy maqalasy jaryq kórdi. Onda zamanymyzdyń zańǵar jazýshysy Muhtar Áýezovtiń 1945 jyldyń jazynda eń aldymen qyzy Láılany elge, Qaraýylda turatyn dosy Baltaqaıdikine til úırensin, aýyl turmysymen tanyssyn dep jibergeni, sodan kóp uzamaı bir top almatylyq dos-jarandarymen Abaıdyń júz jyldyq toıyna kelgende dosynyń Manataı degen jeti jasar ulyn ózimen ala ketip, astanadaǵy Jambyl atyndaǵy №18 orta mektepke ózi ertip baryp oqýǵa bergeni, ony qashan joldy úırengenshe ózi jetelep júrgeni egjeı-tegjeıli baıandalady. Biraq eki jyldan keıin sál aýyryńqyraǵan Manataı jazǵy demalysta elge kelgende Almatyǵa qaıtpaı elde qalyp qoıypty.

Sol eki aralyqta Muhań eldegi dosyna as­tana­daǵy belgili sheberge, tegi Emanýıl Romanenko bolsa kerek, arnaıy tapsy­ryspen dombyra jasatyp, Balta­qaı aq­saqaldyń sol tusta Alma­tyda oqyp jatqan inisi Baqyshtan berip jibe­redi. Álgi dombyrany úırenýge mun­da­ǵylardyń bári qushtar bolypty. Manataı mektep orkestrine osy dombyramen qaty­sypty. Muhań alpys jyldyǵyna oraı elge kelgende ózine kúı shertip bergen buǵan rıza bolypty desedi.

Muhańnyń dombyrasynyń budan keıingi tarıhy tómendegideı. Iаǵnı, Qos­tanaıda osydan jarty ǵasyrdan astam ýaqyt buryn oblysaralyq mılısııa mektebi ashylady. Elimiz egemendikke qol jetkizgennen bergi kezeńde ol Ishki is­ter mınıstrliginiń akademııasyna aına­lady. 2014 jyly osy akademııaǵa res­pýblıka Úkimetiniń qaýlysymen osy salanyń eki ret mınıstri bolǵan, qazaqtan shyqqan alǵashqy general-leıtenant Shyraqbek Qabylbaevtyń esimi beriledi. Sol tusta eks-mınıstrdiń jıen nemeresi Ǵalym Isabaev Qostanaıǵa arnaıy kelip ata­sy­nyń dombyrasyn akademııa bastyǵy, polkovnık Mırlan Qyzylovqa (oqyrmanǵa bıylǵy jyly Elbasy Jarlyǵymen bul azamatqa general sheni berilgenin eskerte ketkenimiz jón bolar) óz qolymen tapsyrady. Solaısha jetpis jyldyq tarıhy bar Áýezovtiń dombyrasy Qostanaıdaǵy polısııa akademııasynyń mýzeıinen bir-aq shyǵady. Taǵy bir aıta ketetin jaıt sol, munda ulylardan qalǵan qundy jádigerge degen qamqorlyq súısintedi. Jergilikti belgili aqyn, onyń syrtynda qolóner sheberi Serikbaı Ospanovqa akademııa bas­shysynyń ózi qolqa sala otyryp, áıgili Áýezovten qalǵan murany jutyndyryp jón­detip qoıǵany soǵan aıǵaq bolsa kerek.

Dáýlet SEISENULY,
Qazaqstannyń qurmetti jýrnalısi

Sýrette: Áýezovtiń dombyrasy