Osynaý oqıǵaǵa elimizdegi Quraq quraý sheberleriniń qaýymdastyǵy uıytqy bolyp otyr. Is-shara aıasynda tuńǵysh ret halyqaralyq art-jobalar kórsetilmek. Festıvaldyń jalaýlatqan jobasy – «ORIENT» atty tańǵalarlyq toqyma pannolardyń jyljymaly kórmesi bolyp tabylady. Onyń quramynda Chehııa, Slovakııa, Birikken koroldikter, Germanııa, Polsha men Qazaqstan sııaqty elderdiń art-kvılt pen pechvork tehnıkasy sheberleriniń qolynan shyqqan 60-tan astam jumys bar.
ORIENT kórmesi – alǵash ret 2017 jyldyń sáýir aıynda Pragada ótken jyl saıynǵy HI halyqaralyq Prague Patchwork Meeting festıvaline qatysyp, ózindik úlgilerimen daralanǵan.
Baıqaýlarǵa toly úlken festıvaldyń taǵy bir tosynsyıy – «Meniń baqsham» atty balalardyń quraq quraý kórmesi bolmaq. Bul bólimge Eýropa men Reseıdiń 6 men 16 jas aralyǵyndaǵy jas sheberleriniń jumystary qoıylady.
Kórme ekspozısııalardan bólek, kelýshilerge tájirıbelik bólim de qarastyrǵan. Festıvaldyń barlyq qatysýshylary qazaqstandyq ismerlerdiń tegin sheberlik saǵattaryna qatysyp, úzdik úrdisterdi úırene alady. Sonymen qatar, festıvalǵa qonaq retinde, Qazaqstandaǵy quraq quraý sheberleri qaýymdastyǵynyń arnaıy shaqyrýymen halyqaralyq deńgeıdegi tanymal kvıltter keledi. Kórmede qoldan jasalǵan buıymdardyń jármeńkesi ótip, elimizdiń tanymal dızaınerleri sándi kıim úlgilerin usynady dep kútilýde.
Qazaqstan quraq quraý sheberleri qaýymdastyǵynyń prezıdenti Tamara Shtroshererdiń aıtýynsha, «Shyǵys bazary» festıvali eń aldymen, elimizdegi ulttyq qoldanbaly quraq quraý ónerin qoldaý men damytýdy kózdeıdi. Al almatylyqtar sheteldik quraq quraýshylardyń qolynan shyqqan dúnıelerdi tamashalasa, óz sheberlerimiz jańa jaýharlar týdyrý úshin toǵysady.
On saýsaǵynan óner tamǵan ismerlerge halyqaralyq qazylar alqasy tórelik etedi. Jeńimpazdarǵa festıval demeýshisi «Bernina» tigin mashınasynyń tanymal brendi baǵaly syılyqtar taǵaıyndap otyrǵan jaıy bar.
Aınash ESALI,
«Egemen Qazaqstan»
ALMATY
