Jaıdarmanshylar búgingi oıynda elimizdegi sońǵy jańalyqtar men ózgeristerdi tilge tıek etip, sapaly oıyn kórsetti. Ásirese latyn qarpine kóshý, «EKSPO-2017» halyqaralyq kórmesiniń aıaqtalýy, «Rýhanı jańǵyrý» baǵdarlamasy týraly jıi aıtyldy. 16 komandanyń ishinen «Jańa ǵasyr», «Qyz Jibek», «IT» komandalary ádil qazy alqalarynyń joǵary baǵasy men kórermenderdiń ystyq yqylasyna ıelendi.
Saıys nátıjesi boıynsha, «Úzdik oıynshy» nomınasııasy «Ala-Too» komandasynyń oıynshysy Aıbek Bektemirovke tabystaldy. «Qyz Jibek» komandasy 3-oryn men 200000 teńgeni qanjyǵasyna basty. Taldyqorǵandyq «Shapalaq» komandasyna 2-oryn buıyrdy jáne 300000 teńge aqshalaı syılyqpen marapattaldy. Oıynnyń basty syılyǵy, Astana qalasy ákiminiń kýbogy men 1 mıllıon teńgeni «Jańa ǵasyr» komandasy utyp aldy. Jeńimpazdardy Astana qalasy ákiminiń orynbasary Ermek Ámirhanuly Amanshaev marapattady.
Qatysýshy komandalar arasynda tek tájirıbeli toptar emes, jas quramalar, túrli respýblıkalyq lıgalardyń jeńimpazdary, sonymen qatar kórshiles Qyrǵyzstannan «Ala-Too» quramasy keldi. Festıval formatynda ótken oıyn bıyl 9-ret uıymdastyrylyp otyr.
Qatysýshylardyń ónerine tanymal telejúrgizýshiler Berik Ýálı men Ashat Sadyrbaı jáne Dana Nurjigit, qoǵam qaıratkeri Murat Ábenov, májilis depýtaty Baqtııar Máken sekildi qazylar quramy tulǵalar baǵa berdi.
