«Aqqý kóli» spektakli, © Astana Opera
«Astana Opera» baletiniń 80-ge jýyq ártisi tehnıkalyq qyzmet jumyskerleri, sahna mehanıkteri, jaryq berýshiler, grım jasaýshylar, kostıýmerler, rekvızıtorlar jáne basqa da qyzmetterdiń jumyskerlerimen birge 24 qyrkúıek kúni alys jolǵa shyqpaq, dep habarlaıdy teatrdyń baspasóz qyzmeti.
– Koroldik opera teatrynyń sahnasynda óner kórsetý biz úshin úlken mártebe. Bul bizdiń Omandaǵy alǵashqy gastrolimiz. Saparymyz asa mańyzdy, sebebi balet sheberliginiń joǵary sapasyn kórsetkimiz keledi. «Astana Opera» teatrynyń trýppasy P.I. Chaıkovskııdiń «Aqqý kóli» baletiniń jańa redaksııasyn usynbaq, sondyqtan týrnemiz eki ese jaýapty. Keıbir ózgeristerdi engize otyryp, biz L. Ivanov – M. Petıpanyń kanondyq qoıylymyn saqtap qaldyq. «Aqqý kólin» kórsetýge sheshim qabyldadyq, sebebi – bul klassıkalyq balettiń nyshany, álemdik brend. Kompozıtor P.I. Chaıkovskıı osy mýzykany uly mura retinde bizge mıras etip qaldyrdy. Bul balet máńgilik, ony bizdiń aǵa býyn tamashalaǵan, bolashaqta urpaqtarymyz tamsanatyn bolady. Aldymyzǵa qoıylǵan mindet – kórermenniń erekshe áser alýy úshin bar kúsh-jigerimizdi salý, - dep atap ótti Altynaı Asylmuratova.
Aqqýlardyń jas hanshaıymy partııasyn – názik Odetta men qatty uqsaıtyn Odılııany «Astana Operanyń» jetekshi solısteri, Qazaqstannyń eńbek sińirgen qaıratkerleri Mádına Baspaeva men Áıgerim Beketaeva oryndaıdy. Hanzada Zıgfrıdti teatrdyń jetekshi solısteri, halyqaralyq baıqaýlardyń laýreattary Erkin Rahmatollaev pen Oljan Tarlanov usynady. Rotbard rólinde balet solısi Arman Orazov debıýt jasasa, omandyq teatr sahnasynda zulym kemeńger beınesinde Jánibek Imanqulov bolmaq.
Qoıylym maestro Djýzeppe Akýavıvanyń basqarýymen Karlo Felıche teatrynyń (Genýıa qalasy, Italııa) sımfonııalyq orkestriniń súıemeldeýimen ótedi.
