Foto: Azamat QASYM, «Egemen Qazaqstan»
Qaladaǵy Jeńis saıabaǵynyń janynan oryn tepken dara tulǵa eskertkishiniń ashylý saltanatyna Parlament Məjilisiniń depýtattary, zııaly qaýym ókilderi men shahar jurtshylyǵy qatysty. «Oblysymyzda Alash qozǵalysynyń 100 jyldyǵyna oraı jyl basynan beri kóptegen is-sharalar uıymdastyryldy. Búgingi is-shara sonyń eń aýqymdysy ári eń mańyzdysy ekeni anyq. Barlyqtaryńyzdy alash ardaqtysy Álıhan Bókeıhan eskertkishiniń ashylýymen quttyqtaı otyryp, oblys ákimi Danıal Ahmetovtiń joldaǵan lebizin jetkizgim keledi. Bul eskertkish óskeleń urpaq úshin, ult múddesi úshin ǵazız jandaryn qurban etken alash qaıratkerlerine taǵzym jasaıtyn qasterli orynǵa aınalady dep senemiz», - dedi eskertkishtiń ashylý rásiminde sóz alǵan Shyǵys Qazaqstan oblysy ákiminiń birinshi orynbasary Nurymbet Saqtaǵanov.
Saltanatty sharaǵa Astanadan arnaıy kelgen Parlament Májilisiniń depýtaty, «Aqjol» partııasynyń tóraǵasy Azat Perýashev alash kóseminiń Alash qalasynyń tórinen oryn alýy Shyǵys jurtynyń ǵana emes, búkil elimizdiń qýanyshy ekendigin atap ótti.
Qoladan quıylǵan, bıiktigi 5 metrden asatyn, oń qolyna asyq ustaǵan alash qaıratkeri eskertkishiniń avtory Baqytbek Muhamedjanov keskekti dáýirdiń kesek tulǵasynyń beınesin somdaý ońaıǵa soqpaǵanyn aıtady. «Álıhan Bókeıhan eskertkishin jasaý baqyty maǵan buıyrǵanyna qýanyshtymyn. Alash ardaqtysy asyqty qolyna bekerge ustap turǵan joq. Qazaqtyń asyǵy alshysynan tússe dep sanaly ǵumyryn ult múddesine sarp etken qaıratkerdiń eskertkishi arqyly halqymyzdyń bolmys-bitimin, arman-ańsaryn kórsetkim keldi», - deıdi músinshi.
Alash qozǵalysynyń 100 jyldyǵyna arnalǵan sharalar legi odan ary «Alash jáne rýhanı jańǵyrý: urpaqtar sabaqtastyǵy» atty halyqaralyq ǵylymı-tájirıbelik konferensııamen jalǵasty. Bilim jáne ǵylym mınıstrligi, halyqaralyq Túrki akademııasy, Semeı qalalyq ákimdigi men Shəkərim atyndaǵy ýnıversıtettiń uıymdastyrýymen ótken alqaly jıynda Ǵarıfolla Esim, Zııabek Qabyldınov syndy ǵalymdar mazmundy baıandama jasady.
Azamat QASYM,
«Egemen Qazaqstan»
