Koroldik áıelderi tarıhta alǵash ret kólik júrgizýge ruqsat aldy. Basylymnyń habarlaýynsha, bul aqparatty Saýd Arabııasynyń Syrtqy ister mınıstrligi de rastap otyr. Monarh bul sheshim qoǵamǵa oń áser etedi dep oılaıtynyn aıtypty. Biraq Jarlyqta avtokólik júrgizý sharıǵat zańdaryna saı bolý kerektigi aıtylǵan.
Sondaı-aq qujat boıynsha ishki ister, qarjy, eńbek jáne áleýmettik damý mınıstrlikteriniń qatysýymen joǵary deńgeıli komıtet qurylyp, 30 kúnniń ishinde kýálik berý tártibi qarastyrylatyny aıtylǵan.
"Bul Saýd Arabııasy áıelderi úshin úlken jeńis. Bul problemamen áıelder birneshe jyl emes, ómir boıy kúresip keldi. Tipti, áıelderge kólik júrgizý kerek emes degen de oılar aıtyldy", deıdi Saýd Arabııasy Shýra keńesiniń músheleri.
BUU Bas hatshysy Antonıo Gýterresh bul sheshimdi qoldaıtynyn bildirdi. Ol óziniń Týıtterdegi paraqshasynda "Saýd Arabııasynyń áıelderge kólik júrgizý quqyǵyn bergenin qoldaımyn. Bul durys baǵyttaǵy mańyzdy qadam", dep jazdy.
Osy kúnge deıin Saýd Arabııasynda áıelderdiń kólik júrgizýine tikeleı tyıym bolmasa da, olarǵa júrgizýshi kýáligi berilmedi.
Esterińizge sala ketsek, Saýd Arabııasynda 2011 jyldan bastap áıelder quqyǵy boıynsha ózgerister engizile bastady. Sol kezde Abdalla atty Korol áıelderge shýraǵa, ıaǵnı Koroldik úkimetindegi keńes organyna saılanýǵa ruqsat berdi. Odan keıin 2012 jyly áıelder alǵash ret Olımpıada oıyndaryna qatyssa, 2015 jyly mýnısıpaldi saılaýǵa qatysý quqyǵyn ıelengen bolatyn.
Gúlnur Qýanyshbekqyzy,
"Egemen Qazaqstan"
