Bul kúni M.Áýezov dańǵyly boıynda beıne jáne aýdıo-jarnama jumys istep, avtobýs aıaldamalarynda merekelik kitap kórmeleri men sholýlary, ádebı «oryndyqtar», mánerlep oqý, jazýshy shyǵarmashylyǵy boıynsha talqylaýlar men vıktorınalar uıymdastyryldy. Qala turǵyndary «Áýezov jolymen» kitap GPS-ne qatysyp, jazýshy ómirbaıany, shyǵarmalary, dańǵylǵa onyń esiminiń berilýi jaıyndaǵy, ózge de qyzyqty ǵımarattarǵa qanyqty.
A.Pýshkın atyndaǵy oblystyq kitaphana QR-kitaphana men Uni Library mobıldi oqý zaly qyzmetin usyndy. Kitaphana saıtynda ornalasqan onlaın nusqasy bar ınteraktıvti vıktorına (http://kray.pushkinlibrary.kz) jerlesimizdiń shyǵarmashylyǵy týraly turǵyndardyń bilimin tekserýge tamasha múmkindik berdi. Oblystyq mamandandyrylǵan kitaphana zaǵıp jáne nashar kóretin adamdarǵa arnap óz baǵdarlamasyn uıymdastyrdy. M.Áýezov dańǵyly boıymen júretin marshrýttyq avtobýs jolaýshylary da nazardan tys qalmady. Eń belsendi jolaýshylar yntalandyrý syılyqtarymen marapattaldy.
«Biz Muhtar Áýezov shyǵarmalaryn qazaq jáne orys tilderinde de oqımyz. Men búgin ózimmen birge 9-synyptyń oqýshylaryn ertip keldim. Bul mektepke eki jyldan bergi jumys istegen ýaqytymda balalardyń kitapty az oqıtynyn ańǵardym. Bul – bizdiń qalaǵa, oblysqa ǵana emes, elimizge, búkil álemge ortaq problema dep oılaımyn. Qazirgi oqýshylar kitapty ınternet arqyly oqıdy. Men oqýshylaryma Muhtar Áýezovtiń kitabyn oqý qajettigin aıtqanymda birden ǵalamtorǵa enip, oqı jóneldi. Bul jaǵdaı bir jaǵynan kóńilge kirbiń túsirgenimen, zaman talabyna qarsy tura almaımyz. Eń bastysy, kitap oqýǵa degen qulshynystary tómendemese deımiz», - deıdi qaladaǵy № 18 mekteptiń kitaphanasynyń meńgerýshisi Valentına Ivanova.
Azamat QASYM,
«Egemen Qazaqstan»
О́SKEMEN
