Is-shara aldymen oqýshylardyń sherýimen bastaldy. Ál Farabı alańynda ótken erekshe sherýdi Ońtústik Qazaqstan oblysynyń ákimi J.Túımebaev, Shymkent qalasynyń ákimi Ǵ.Ábdiraxymov jáne elaǵalary men shahar turǵyndary tamashalady.
Alańǵa jınaǵan óner mektebiniń shákirtteri, mýzyka jáne horeografııa ujymdary men jas sportshylar merekelik sherýmen júrip ótti. 1500-den astam oqýshy qatysyp, sap túzegen is-sharany qala jáne óńirimizdiń turǵyndary tamashalady.
Aıta ketý kerek, merekelik ár sherý ár taqyrypqa arnaldy. Budan keıingi is-shara atshabarda ótti. Munda alaman báıgesi uıymdastyryldy. Oblystyq ulttyq sport túrleri mektebiniń muryndyq bolýymen ótken báıgege osy mekteptiń óńirimizdiń aýdan-qalalarynan kelgen jas shákirtteri qatysty. 16 shaqyrymǵa sozylǵan báıge jeńimpazdaryn oblys ákimi Janseıin Túımebaev marapattap, júldelerin tabys etti. Aıta keteıik, alaman báıgeniń jeńimpazy atanǵan shabandoz Smaıl Jeńiske bas júldege tigilgen "Nıva" avtokóligi tartý etilse, ekinshi oryn alǵan Jasulan Turǵanbaevqa – 450 myń teńge, al úshinshi oryn ıegeri Alık Nurmahanbetovqa 300 myń teńge aqshalaı júldeniń sertıfıkaty tabys etildi.
Taǵy bir aıta qalarlyqtaı is-shara Naýryz alańynda ótti. Munda baýyrsaq pisirýden absolıýttik rekord jasaldy. Qala kúnin atap ótý barysynda Qazaqstannyń «KInES» rekordtar kitabynyń (Gınnestiń rekordttar kitabynyń qazaqstandyq nusqasy) jańa rekordy tirkeldi. «Altyn dán» kompanııasynyń qoldaýymen jergilikti úzdik 20 aspaz 1139 keli baýyrsaq pisirdi. Jańa rekord jasalyp, arnaıy komıssııada tirkelgeni jaıly sertıfıkat rekord ornatýshylarǵa tabystaldy.
Aıta keteıik, buǵan deıingi rekord Almatyda tirkelip, onda 856 keli baýyrsaq pisirilgen edi. Al óńirimizdegi rekordty ornatý úshin 750 keli un, 400 lıtr maı, 60 keli qant pen 150 lıtr sút jumsaldy. Bir tonnadan astam baýyrsaq 10 qazanda pisirildi. Al salmaǵy arnaıy tarazyda ólshendi. Rekord tirkelgen soń baýyrsaq arnaıy qaǵaz qaltalarǵa salynyp, qonaqtarǵa taratyldy. Aıta keteıik, qala kúni merekesine 30 myńnan astam adam qatysýda. Mereke keshkilik gala-konsertpen jalǵasatyn bolady. .
