D.Nazarbaeva komıtet otyrysyn asha kelip, Elbasy elimizdiń qorǵanys qabilettiligi men áskerı qaýipsizdigin qamtamasyz etýge, áskerlerdiń daıyndyq deńgeıin arttyrýǵa, áskerı tehnıkanyń jańǵyrtylýyna erekshe nazar aýdaratynyn atap ótti.
Elimizdiń Áskerı-Teńiz kúshteriniń qolbasshysy Jandarbek Janzaqov, UQK Tóraǵasynyń orynbasary-Shekara qyzmetiniń dırektory Darhan Dilmanov, Aqtaý teńiz portynyń jaı-kúıi men damý keleshegi týraly «Aqtaý halyqaralyq teńiz saýda porty» ulttyq kompanııasy» AQ prezıdenti A.Túrikpenbaev sóz sóıledi.
Kóshpeli otyrysty aıaqtaı kelip, D.Nazarbaeva Batys aımaqtyń qaýipsizdigin qamtamasyz etýdiń strategııalyq mańyzyn atap ótti. Senator elimizdiń shekara qyzmeti men áýe qorǵanysyn nyǵaıtýdyń úsh jyldyq baǵdarlamasyn ázirleý qajettigin aıtty.
D.Nazarbaevanyń pikirinshe, brakonerlikpen kúres, otandyq keme jasaý, áskerı qyzmetkerlerdi turǵyn úımen qamtamasyz etý, Shekara qyzmetine áskerı bólimshe ornalasqan jerlerden jer telimderin berý máseleleri tezirek sheshýdi talap etedi. Halyqaralyq qatynastar, qorǵanys jáne qaýipsizdik komıtetiniń tóraǵasy Aýyl sharýashylyǵy mınıstrligi basshylyǵynyń qatysýymen Senatta dóńgelek ústel ótkizýdi tapsyrdy.
Aqtaýda bolǵan kezinde senatorlar áskerı-teńiz bazasynda, teńiz jaıaý áskeri brıgadasynda, áýe qorǵanysy nysandarynda, Aqtaý halyqaralyq teńiz saýda porty men teńizdegi soltústik termınalda, Túrikmenstanmen shekaradaǵy tehnıkalyq baıqaý beketinde jáne «Quryq» portynda boldy. Depýtattarǵa Shekara qyzmetiniń jáne Áskerı-Teńiz kúshteriniń «Sarbaz», «Qaraǵandy», «Alataý», «Oral» kemeleri, sondaı-aq teńiz bóligindegi memlekettik shekarany qorǵaý jáne kúzetýde shekarashy bólimshelerimen ózara is-qımyl tártibi kórsetildi.
Senatorlar Aqtaýda «Daryn» beıimdeý mektebiniń jumysymen jáne materıaldyq-tehnıkalyq bazasymen de tanysty. «Samuryq-Qazyna» qory iske asyrǵan «Meniń elim» baǵdarlamasy aıasynda Mańǵystaý oblysyndaǵy zaǵıp balalarǵa arnalǵan 4 beıimdeý mektebi arnaıy beıimdeý jabdyqtarymen jáne ádistemelik materıaldarmen qamtamasyz etildi.
2017 jylǵy qazanda Aqtóbe, Atyraý, Batys Qazaqstan jáne Shyǵys Qazaqstan oblystaryndaǵy 25 mektepti jabdyqtaý josparlanyp otyr.
