Jıynǵa Syrtqy ister mınıstri Qaırat Ábdirahmanov, Keńes Hatshylyǵynyń atqarýshy dırektory Gýn Szıanveıa jáne birqatar qurmetti qonaqtar qatysty.
Kórmeniń ashylý saltanatynda sóz sóılegen Q.Ábdirahmanov mundaı sharalardyń el ıgiligi úshin tıimdi ekenine toqtaldy. Onyń pikirinshe, kitaphanadaǵy kórme Keńestiń jumysyn keń kólemde kórsetip, onyń qalyptasý tarıhy men damý kezeńinen mol aqparat beredi.
Sonymen qatar, Mınıstr Azııadaǵy ózara is-qımyl jáne senim sharalary jónindegi keńestiń qyzmeti týraly tarqatyp aıtyp berdi. Q.Ábdirahmanovtyń sózine súıensek, atalǵan Keńes qazirgi zaman talabyna saı.
«Elbasy Nursultan Nazarbaevtyń Azııadaǵy ózara is-qımyl jáne senim sharalary jónindegi keńes qurý týraly bastamasy óz maqsatyna jetti. Búgingi tańda Keńes qurlyqtaǵy ujymdyq qaýipsizdikti jan-jaqty talqylaýǵa múmkindik beredi. Bul oqıǵa qazaq halqynyń jahandyq qaýymdastyqqa terezesi teń el retinde qosylǵanyn aıǵaqtap, babalarymyz birneshe ǵasyr ańsaǵan táýelsizdiktiń aıqyn kórsetedi», – dedi Q.Ábdirahmanov.
Vedomstvo basshysynyń sózine súıensek, mundaı kórmeler Elbasynyń mańyzdy saıası bastamalaryn tolyq túsinýge múmkindik beredi. Ol kitaphana oqyrmandary men qonaqtary Keńes qyzmeti jáne Elbasynyń eren eńbegi jaıynda mol maǵlumatqa qanyq bolatynyn atap ótti.
Syrtqy ister mınıstri Azııada áli kúnge sheshimin tappaǵan birqatar kúrdeli máseleler bar ekenin sóz etti. Onyń paıymdaýynsha, mundaı shıelenisterdi sheship, halyqaralyq qaýipsizdikti qamtamasyz etýdiń jalǵyz aıqyn tetigi – memleketter arasyndaǵy senimdi arttyrý qaǵıdaty. Osy oraıda, Is-qımyl jáne senim sharalary jónindegi keńes kúrmeýge kelmeıtin kúrdeli kelispeýshiliktiń utymdy sheshimin tabýǵa múmkindik beredi.
Keńes Hatshylyǵynyń atqarýshy dırektory Gýn Szıanveıa qatysýshylardy mereıtoımen quttyqtap, uıymdy qurý jónindegi Elbasynyń bastamasyn joǵary baǵalaıtynyn jetkizdi. Onyń pikirinshe, kórme tarıhı sheshimder men atqarylǵan jumystardan jan-jaqty habar beredi.
Kórmede muraǵat qujattary, tarıhı fotosýretteri usynylǵan. Sonymen qatar, halyqaralyq qaýipsizdik jónindegi jáne Elbasynyń syrtqy saıası bastamalary taqyrybyna arnalǵan kitaphana jınaqtary qoıyldy.
Ujymdyq qaýipsizdik máselesi jónindegi Azııa qurlyǵyndaǵy eń iri forýmnyń mereıtoıyna kelgen meımandar tarıhı bastamadan habar beretin sharalardy jıi ótkizýdiń paıdasy mol ekenin málimdedi. Sonymen birge, olar Keńestiń jumysyn odan ári nyǵaıtýdyń mańyzdylyǵyn sóz etti.
Elbasy N.Nazarbaev Azııadaǵy ózara is-qımyl jáne senim sharalary jónindegi keńesti shaqyrý bastamasyn tuńǵysh ret 1992 jylǵy 5 qazanda BUU-nyń 47-shi Bas Assambleıasynda jarııalaǵan bolatyn. Atalǵan Keńestiń maqsaty – Azııadaǵy beıbitshilik pen qaýipsizdikti qamtamasyz etý úshin tıimdi jáne qolaıly qurylym alańyn ornatý. Qazirgi tańda álemniń 26 memleketi Keńes quramyna engen. Sonymen qatar, 9 memleket pen 5 halyqaralyq uıym baqylaýshy retinde qatysady. Taıaýda BUU Bas Assambleıasynyń 72-shi sessııasy aıasynda Qazaqstan Prezıdenti bastamasynyń 25 jyldyǵyna arnalǵan, Keńeske múshe elderdiń Syrtqy ister mınıstrleriniń beıresmı kezdesýi ótti. Onda qatysýshylar halyqaralyq kún tártibindegi ózekti máselelerdi talqylap, forýmnyń shırek ǵasyrdaǵy jetistigin atap ótip, uıymnyń aldaǵy maqsattaryn aıqyndady.
Abaı ASANKELDIULY,
«Egemen Qazaqstan»
