Bul týraly búgin OQO óńirlik kommýnıkasııalar qyzmetinde ótken baspasóz máslıhatynda oblystyq jer qatynastary basqarmasynyń basshysy Sozaqbaı Ábdiqulov málim etti.
Onyń aıtýynsha, túgende jumystary kezinde 5912 jer paıdalanýshylardyń 241 myń ga jerleri paıdalanylmaı jatqandyǵy anyqtalǵan.
«Esepti kezeńde 63,8 myń gektar jer aýdan, qala ákimdigi tarapynan memleket menshigine qaıtarylsa, 61,1 myń ga jer qaıta ıgerýge kiristi. Al 5,24 myń ga jer ıesiz múlik retinde esepke qoıylsa, 27,1 myń ga jer aýdan ákimdiginiń qaraýyndaǵy jerler bolyp shyqqan. Sondaı-aq, 83,8 myń ga bolatyn jerlerge shara kórý úshin oblystyq jer ınspeksııasy basqarmasynyń qaraýyna usynyldy», - dedi basqarma basshysy.
Brıfıngte málim bolǵandaı oblystaǵy ınvestısııalyq ahýaldy jaqsartý maqsatynda aýyl sharýashylyǵy jerler konkýrs arqyly aınalymǵa engizilýde. Máselen, sońǵy 3 jylda aýyl sharýashylyq maqsatyndaǵy 53 konkýrs uıymdastyrylǵan. Nátıjesinde 309 myń ga jer ýchaskeleri jalǵa berildi, al bıylǵy jyly 73,8 myń ga jer aınalymǵa qosylyp otyr.
Aıta keteıik, óńirde aýyl sharýashylyǵy baǵytyndaǵy 6815,7 myń ga jerler bolsa, onyń ishinde 911,4 myń ga egistik jer, 5635,8 myń ga jaıylymdyq, 84,5 myń ga shabyndyq, al kóp jyldyq ekpeler (baýlar) 29 myń gektardy qurap otyr.
