Túrkııada bastaý alǵan 2017 jylǵy álemdik týrdyń alǵashqy kezeńi Alanııa qalasynda bastaldy. Bul kezeńde veloshabandozdar Kemer qalasyna deıingi 177 shaqyrym tasjoldy júrip ótti. Alǵashqy kezeńde velosportshylar jarysqa boı úıretip, bir-birin áleýetine syrttaı baqylaý júrgizetini bar. Degenmen, máre syzyǵyna 1,5 shaqyrym qalǵanda «Astananyń» tórt birdeı shabandozy úlken kúshpen alǵa umtyldy. Alaıda, qarsylastary da qarap qalmady. «Bora Hengsgroh» komandasynyń ókili Sem Bennet birinshi týrda shashasyna shań juqtyrmaı, márege birinshi bolyp keldi. Al «Astana» komandasy sapynda eń jaqsy nátıjeni Mınalı Rıkardo kórsetti. Ol máre syzyǵyn altynshy bolyp kesti. Elordanyń atymen synǵa túsetin ujymnyń qalǵan jigitteri tek alǵashqy jıyrmalyqtyń qatarynan kórindi.
«Astana» komandasynyń sporttyq dırektory Dmıtrıı Sedýnnyń aıtýynsha, atalǵan jarysta jas veloshabandozdarymyzdyń aıaq alysyn baıqap, komandalyq esepte jeńiske jetýdi de kózdeıtinderin aıtady. «Biz árqashan da joǵarǵy kórsetkishterge umtylamyz. Bes birdeı qazaqstandyq veloshabandozdy «Túrkııa týryna» qatystyryp otyrmyz. Solardyń ónerine baǵa beremiz. Rýslan Tileýbaev, Jandos Bıjigitov, Nıkıta Stalnov, Sergeı Chernetskıı sekildi jigitter velosportymyzdyń bolashaqtary. Dál qazir osy atalǵan shabandozdardyń synalatyn sáti. Odan bólek, komandalyq esepte jeńiske jetýdi de kózdeımiz. Árıne, kún saıynǵy jaǵdaıǵa baılanysty maqsatty da ózgertip turamyz. Munda tek myqtylar ǵana bıikten kórinetinin esten shyǵarmaǵanymyz jón», deıdi ol.
Al «Astana» veloshabandozy Dmıtrıı Grýzdev, jarys kórigi ekinshi kezeńnen bastap qyzatynyn aıtady. Sondaı-aq ol dástúrli «Túrkııa týrynda» jeńiske jetýdi kózdeıdi. «Ekinshi kezeńde taýly aımaq bolady. Sondyqtan da, taza sprınterler jeńedi dep aıtý qıyn. Alǵa ozyp shyqqan shabandozdardyń ýaqyty tym kóp bolsa, olardy qýyp jete almaıdy. Demek, ekinshi kezeń aýyr ótedi degen sóz. Degenmen, bıylǵy «Túrkııa týryndaǵy» basty maqsatym – jarys jeńimpazy ataný», deıdi Grýzdev.
«Túrkııa týryna» elimizdiń «Astana» velokomandasynan bólek AQSh, Germanııa, BAÁ, Italııa, Ispanııa, Reseı, Polsha, Belgııa, Brazılııa jáne Túrkııanyń ulttyq quramasy sekildi 13 qurlyqaralyq jáne kásibı komandalar baq synaýda. Aldaǵy kúnderi «Túrkııa týrynyń» taǵy tórt kezeńi ótedi. Jarys jeńimpazy Ystanbulda anyqtalady.
Ermuhamed MÁÝLEN,
Túrkııadan
