Jıyn barysynda Ortalyq saılaý komıssııasynyń múshesi Marat Sársembaevtyń kórshi eldegi saılaýdy baıqaýǵa barýy jónindegi másele qaraldy. M.Sársembaev otyrysta osy jóninde bastama kótergen bolatyn. Komıssııa músheleri onyń usynysyn bir aýyzdan qabyldady. Komıssııanyń sheshimi Qyrǵyzstan tarapyna jetkizildi.
Ortalyq saılaý komıssııasynyń mundaı sheshim shyǵarýyna Qyrǵyzstan prezıdenti Almasbek Atambaevtyń Qazaqstandy aıyptaýy sebep bolyp otyr. Áıtse de, qazaqstandyqtar halyqaralyq uıymdardyń quramynda Qyrǵyzstan prezıdentin saılaý barysyna baqylaýshy retinde qatysa alady. Elimizdiń atynan Qyrǵyzstanǵa attanatyn baqylaýshylar daýys berýdiń ádil ótýine múddeli ekenin aıtady M.Sársembaev.
«Qyrǵyzstanǵa baratyn áriptesterimiz ádildikti birinshi orynǵa qoıady. Olar barynsha obektıvti baǵa berýge talpynady. Alda-jalda halyqaralyq uıymdar daýys berý Qyrǵyzstannyń Konstıtýsııasy men saılaý zańnamasyna saı ótti dep sheshim shyǵarsa, bizdiń baqylaýshylar sol pikirdi ustanady», – dedi M. Sársembaev.
Ortalyq saılaý komıssııasynyń basshysy Berik Imashevtyń aıtýynsha, Qazaqstan ózine berilgen halyqaralyq mindettemelerdi oryndaı otyra Qyrǵyzstandaǵy prezıdenttik saılaýǵa baqylaýshy retinde ókil jiberedi. Onyń sózine súıensek, halyqaralyq uıymdar quramyndaǵy 46 qazaqstandyq aıyr qalpaqty aǵaıyndardyń daýys berýi qanshalyqty ádil ótkenin baıqap qaıtady.
Sonymen qatar, jıyn barysynda A.Atambaevtyń málimdesi shyndyqqa saı kelmeıtini jáne onyń sózderi baýyrlas eki el arasyndaǵy dostyqqa syzat túsirmeıtini sóz boldy.
