Retro-saıabaq ótken ǵasyrdyń 50-jyldaryndaǵy neoklassıkalyq stılde jasalǵan. Negizgi aýmaǵy Jaıyq ózeniniń jaǵalaýy men alleıalarmen emin erkin, jaıaý demalýǵa arnalǵan.
- Atyraý turǵyndarynan qosymsha demalys oryndaryn salý jóninde usynystar túsedi. Jańa rekreasııalyq aýmaqtar jasaý jumystary jalǵasady. "Jeńis saıabaǵyn" úlkeıtý, H.Dosmuhamedov atyndaǵy Atyraý memlekettik ýnıversıteti janyndaǵy Jaıyq ózeniniń jaǵasynan saıabaq jasaý josparda bar. Basqa da jobalar júzege asady, biz sizderdiń qoldaýlaryńyzǵa senemiz, dedi jınalǵan qala turǵyndaryna oblys əkimi Nurlan Noǵaev.
Retro-saıabaq qurylysy 2015 jyldyń aqpanynda bastalǵan. "Teńizshevroıl" JShS "Igilik" əleýmettik-ınfraqurylym baǵdarlamasy aıasynda salǵan saıabaq Jaıyq ózeniniń jaǵasynda Turǵyndar qalashyǵy yqsham aýdanynda ornalasqan. Jańa demalys oryny klassıkalyq stılde jabdyqtalǵan: amfıteatr, kafe, kórme pavılony, mýzykalyq sýburqaq, jasandy toǵan bar. Beınebaqylaý júıesi men radıotorap ornatylǵan.
Saıabaqta "Dos-Muqasan" mýzykalyq ansambline eskertkish qoıyldy, onyń ashylýyna ansambl músheleri arnaıy kelip qatysty.
Joba boıynsha alańdaǵy 3,5 ga jerge 750 aǵash otyrǵyzyldy.
"Igilik" baǵdarlamasyn júzege asyrý aıasynda 250 mln AQSh dollary ıgerilip, 130 joba júzege asty. Sonyń nətıjesinde dəriger, muǵalim jəne tehnıkalyq qyzmetkerlerge 1000 - nan astam jumys oryny quryldy.
- Retro-saıabaq Atyraý qalasynyń turǵyndary úshin ǵajaıyp demalys oryny bolaryna senemiz, deıdi TShO kompanııasynyń bas dırektory Ted Edchıson.
