Foto: Úkimettiń baspasóz qyzmeti
Úkimet basshysy Semeı qalasyndaǵy ákimshilik iskerlik ortalyqty damytý jobalarymen jáne Alakól jaǵalaýyn damytýdyń keshendi josparymen tanysty. Usynylǵan bastamalar Memleket basshysynyń tapsyrmasyna sáıkes, Abaı Qunanbaıulynyń 180 jyldyǵyna arnalǵan «Abaıǵa qurmet» respýblıkalyq aksııasy aıasynda iske asyrylyp jatyr.
Alakól jaǵalaýyn damytý jobasy aıasynda zamanaýı týrıstik-rekreasııalyq aımaq qalyptastyrý kózdelgen. Oblys ákimi Berik Ýálıdiń aıtýynsha, óńirde týrızmdi damytý úshin 2029 jylǵa deıin 49 joba júzege asyrý josparlanǵan. Sondaı-aq 2025 jyly Alakól jaǵalaýynyń ınfraqurylymyn damytýǵa 1 mlrd teńge bólingenin, bul qarajat jaǵalaýdy nyǵaıtý jumystaryn júrgizýge, abattandyrý men kóshelerdi jóndeýge baǵyttalǵanyn aıtty.
«2026 jyly bul maqsattarǵa 10 mlrd teńge bólingen. Bul qarajat ınjenerlik jáne kólik ınfraqurylymyn jańǵyrtýǵa, sondaı-aq sıfrlyq sheshimderdi engizýge, onyń ishinde beınebaqylaý júıelerin jáne ornyqty mobıldi ınternet-qamtýdy engizýge baǵyttalady», delingen habarlamada.
Josparǵa sáıkes, Alakól aýmaǵyn 300 gektardan 3 myń gektarǵa deıin ulǵaıtý, sondaı-aq táýligine 75 myń týrıst qabyldaý múmkindigine jetkizý kózdelip otyr. Keshendi josparǵa engiziletin túzetýler bıylǵy qyrkúıek aıyna deıin aıaqtalady. Sonymen qatar elektr jelileri, sýmen jabdyqtaý jáne sý burý júıeleri, kólik jáne kommýnaldyq ınfraqurylym nysandaryn salý jobalary qamtylǵan.
О́ńirde týrızmdi damytý baǵytynda naqty nátıjeler de bar. 2025 jyly jalpy quny 8,9 mlrd teńge bolatyn 4 joba júzege asty.
Premer-mınıstr Almaty JEO-laryna qatysty obektıvti aqparat berýdi tapsyrdy
Jalpy respýblıka boıynsha da sala qarqyndy damyp keledi. Qabyldanǵan sharalardyń nátıjesinde ishki týrıster sany 9,1 mln-nan 10,1 mln-ǵa deıin, al sheteldik týrıster sany 1,3 mln-nan 1,4 mln-ǵa deıin artqan. Kelýshilerdi ornalastyrý nysandarynyń kiristeri 350,6 mlrd teńgeni qurasa, salaǵa tartylǵan ınvestısııalar kólemi 32,6% ósip, 1,26 trln teńgege jetken.
Oljas Bektenov «Semeı ormanynda» JI negizindegi órtti erte anyqtaý júıesin tekserdi
Semeı qalasynda júzege asyrylatyn iri jobalardyń biri – ákimshilik iskerlik ortalyq. Aýmaǵy 1 myń gektardan asatyn bul jobanyń sheńberinde jańa zamanaýı nysandar salý josparlanǵan.
«Osy rette Semeı qalasynda Ákimshilik iskerlik ortalyǵy (ÁIO) jobasyn júzege asyrý kózdelgen. Aýmaqtyń jalpy aýdany 1 myń gektardan asady. Joba aıasynda áleýmettik jáne iskerlik ınfraqurylymy damyǵan jańa zamanaýı turǵyn úı aýdanyn qurý josparlanýda. 2026-2029 jyldar aralyǵynda jalpy aýdany 3 mln sharshy metrden asatyn 75 myń adamǵa arnalǵan turǵyn úı keshenderin, sondaı-aq 17 mektep pen balabaqshany qosa alǵanda, 40-tan astam áleýmettik, kommersııalyq jáne ákimshilik maqsattaǵy nysandardy salý qarastyrylǵan», delingen habarlamada.
Premer-mınıstr qala qurylysyna qatysty sheshimderdiń sapasyn qamtamasyz etý jáne oblys ákimdigi tarapynan keshendi jospardy júzege asyrýdy tıimdi úılestirý qajettigin atap ótti.
