Jańaózende janǵan juldyzdar

Jańaózen – munaıshylar ordasy. Jyl sanap kórkeıip, kóriktenip kele jatqan qutty meken. Qalanyń alǵashqy turǵyn­darynyń biri retinde osyndaǵy árbir jańalyq, oń ózgeristerge kóńil marqaıyp, masattanyp qalamyz. Olaı deıtinim, ótken jyly ǵana qalamyzda aımaqta teńdesi joq sporttyq saýyqtyrý kesheni, tórt balabaqsha, bir aýrýhana, tórt 50 páterli turǵyn úı paıdalanýǵa tapsyryldy. Bul kúnderi bir orta mektep pen perzenthana qurylysy júrip jatyr. Elbasy Nursultan Nazarbaevtyń tapsyrmasyna oraı Úkimet 2009-2012 jyldarǵa arnalǵan keshendi jospar qabyldap, ony júzege asyrýǵa 42,9 mlrd. teńge bólingen. Al jaqynda oblys basshysy Qyrymbek Kósherbaevtyń tóraǵa­lyǵymen taǵy da Jańaózen qalasynyń eko­nomıkalyq damýynyń 2012-2020 jyldarǵa arnalǵan uzaq merzimdi baǵdarlamasy jobasynyń tanystyrylymy ótti. Onda Elbasynyń Úkimetke, ákimdiktermen birigip aımaqtardy damytý boıynsha baǵdarla­malar ázirleý jónindegi tapsyrmasyna oraı «Olımpeks Edvaızers» konsaltıngtik  toby múmkindikterge saı júzege asýdaǵy ınvestısııalyq jobalardy eskere otyryp qalanyń 2020 jylǵa deıingi ekonomıkalyq damýynyń uzaq merzimdi baǵdarlamasy jasaqtalǵany belgili boldy. Ol baǵdarlama boıynsha Jańaózen munaıshylar qalasy ǵana emes tranzıttik kóliktik-logıstıkalyq ortalyq retinde de damıdy. «Soltústik –Ońtústik» halyqaralyq dálizinde stra­tegııalyq retteýshi ortalyq retinde Qazaqstan, Reseı, sondaı-aq Túrkimenstan, Iran, Parsy shyǵanaǵy, Ońtústik-Shyǵys Azııa elderine qyzmet kórsetedi. Sebebi Jańaózen – Túrkimenstan temir jolyna qosa, «Jańaózen – Saıótes» temir joly, «Jańaózen – Quryq» avtojolyn kedendik resimdeý ortalyǵy kiretin kóliktik-logıs­tıkalyq ortalyq salý kózdelýde. Jáne atalmysh baǵdarlama aıasynda Jańaózende ornalasatyn «Kaspıı» arnaıy ekonomıka­lyq aımaǵy qurylmaqshy. Bul baǵdarlama boıynsha qalanyń áleýmettik jáne ınjenerlik ınfraqurylymdarynyń odan ári damýyna, qala mańynda agro­ónerkásiptik keshendi órkendetip, sol arqyly irgeles otyrǵan eldi mekenderdiń de turmys-tirshiligine ıgi yqpal etý kózdelipti. Osyndaı jaǵymdy jańalyqtar Elbasynyń, Úkimettiń, oblys basshylyǵynyń qalanyń kóptegen jyldardan beri qordalanyp qalǵan problemalaryn oń sheshýde jasap otyrǵan qamqorlyqtary men kómegi ekendigi belgili. Asylbek AIDAROV, Jańaózen qalasy ákimi janyndaǵy ardagerler keńesiniń tóraǵasy.