Aqparat naqtylyǵynyń kúmándiligi óz aldyna, habar qas qaǵym sátte qoldan qolǵa ótti, alpys shahar asty. Alaıda, álgi jerge bir mashına «ekinshi nan» – kartop tógilse, saıttar bulaı shýlamas edi. Nege? Bul – birinshi óz jazylýshylarynyń delebelerin qozdyryp, «kúldirip» qoıý úshin jasaǵan hareketi-tin. Aqparatqa taqyryp latynsha Saebiz (sábiz) dep qoıyldy. Atalǵan saıttyń memleketimizge latyn álipbıine kóshýge qadam jasap jatqan tustaǵy qoldaýy shyǵar!? Áıtpese orys tilindegi «analız» sóziniń aǵylshynsha ataýy o basta «analysis» emes pe edi? Ony eshkim býynǵa bólip oqyǵan joq, kúlgen joq?! Al... «saebiz-sábiz» kúlkili eken?! Búgingi Qazaqstannyń alty jasar balasy «bir, eki, úsh» sandaryn «one, tvo, three» demeı-aq, «ýáan, túý, frı...» dep taqyldap tur.
Ol az deseńiz «toǵyz» degendi sıfrdy «nıne (nine)» demeı «naın» deıdi. Áńgime endi sol «nıne»-den shyǵady ǵoı, esterińizde bolsa, álem fýtbolshylarynyń eń úzdik komandasyna beriletin altyn kýbokti keńes zamanynda qanshama jyl boıy «uly tilmen» Altyn Nıke (nike) dep keldik. Nebir aýzymen qus tistegen sport komentatorlary, nebir dilmar memleket, qoǵam qaıratkerleriniń ózi de solaı dedi. Eshkim kúlgen joq. Qazir ǵoı «Altyn Naık» kýbogi dep júrgenimiz... Kúndelikti álemdik jelige kirip turatyn kez kelgen kózi ashyq jan «Google» sózin bir-aq aýyzben «gýgl» deıdi emes pe? Endeshe biz nege sonshama «saebiz»-ge shúıligip qaldyq? Ári bul bir emes!..
Qazir qandaı ortada bas qosa qalsaq ta eldegi eń basty oqıǵa – latyn álipbıine kóshý týraly áńgimege toqtamaı, aralaspaı ótpeıtin halge jettik. Ol zańdy da. «Iа bel ketedi, ıa belbeý ketedi» degen ǵalym-tilshilerimiz kúndiz kúlki, túnde uıqy kórmeı, jańa qaripti qyzmetke qosý úshin kóz maıyn taýysýda. El gazeti – «Egemende» barsha qoǵam ókilderiniń kún saıyn jarııalap jatqan pikirleri san-alýan bolǵanymen múddeniń bir ekeni de erekshe baıqalady. Soǵan qaramastan keıbir aǵaıyndarymyzdyń arasynda latyn emlesin jeńil kúlkige salyp, qyljaqqa aınaldyryp jatqandaryn ózderi de túsinbeı júrgenderi bar. О́kinishti!
Endi eń aldymen latyn alfavıtiniń álemdik ústemdigine oraı isti meılinshe bura tartyp, memlekettik, ulttyq naýqandy mysqyldap kúlkige aınaldyrǵysy keletinderdiń súıkimsiz áreketterin saraptap (analysis) alaıyqshy. Keıbir BAQ-tar arasynda baqadaı shýlap joqtan ózgeni kelemejdeý Qazaqstan táýelsizdik alǵan tusta, elimizdiń ulttyq rámizderi men tól teńgesi týǵanda, Qarýly Kúshterimizdi qurǵanda, Astana aýysqanda, qala attaryn ózgertkende boı kórsetken! Demek, kırıllden latynshaǵa kóshýdiń saıası máni solardyń qaı-qaısysynan da osal túsip turǵan joq! Kórshi memleketter «sábizimizge» til tıgizse, sóz joq, Syrtqy ister mınıstrligimizden renish notasyn qabyldary daýsyz. Al ózimizdiń kúlkiqumarlarǵa «jeńildik» berilip tur. Bálkim, «Bas jarylsa – bórik ishinde, qol synsa – jeń ishinde» shyǵar...
Orys tildi eki áriptesimniń qylyqtary men qyzyqtary esimde qalypty. Ǵalymjan – qandaı da bir jańalyqtyń naqtylyǵyn anyqtaý úshin jas jýrnalısterge «OBS emes pe, kózderiń jetip tur ma?» dep talap qoıatyn. «OBS degen ne?» degen saýalǵa ol «Odna baba skazala...» dep salmaqty ǵana jymııatyn. Naǵyz mektep. Ekinshisi – Sergeı. Sol aqkóńil jigit birde «Soǵys týraly ózbek fılminde soldattardyń «Assalaýmaleıkým, Gıtler aka!» degenin óz kózimmen kórdim, eki kún kúldim dep meni sendirgisi keldi. «Múmkin emes, bul degen menińshe – «Salamatsyz ba, Gıtler aǵa!», senińshe – «Zdravstvýıte, brat Gıtler!» deý ǵoı. Sen ekeýmiz keńes mektebinde oqydyq, tárbıesin aldyq, keńestik fılmde solaı bolýy múmkin be edi, óziń aıtshy?» deımin. Bireýden estigen anekdoty ekeni anyq! Moıyndamaıdy, ishin basyp kúlip júrdi. Kúlegesh jigit!..
Sol aıtqandaı, latyn álippesine kóshý ústinde úıirilip áli talaı jeldiń soǵatyny, talaı sybystyń shyǵatyny daýsyz! Ǵalymjan aıtqandaı, «obs»-ǵa senip qalmaǵandaryńyz abzal! О́ıtkeni, «sary» paraqty saıttyń oqylymyn arttyratyn «sábiz» tektes jańalyqty qazirgi býyn avtobýstyń ishinde otyryp-aq, sýretin qıyp, oqıǵasyn kelistirip, anonımniń (anonymous-aǵylsh.) atynan «laqtyryp» jibere alady, senińiz! IT men smartfonnyń arqasynda, árıne!..
