Olardyń arasynda Osmanakýn Ibraıymov syndy sózi salmaqty memleket jáne qoǵam qaıratkerleri de bar ekenin jazǵan bolatynbyz. О́tken juma kúni Qyrǵyzstannyń taǵy bir eks-memlekettik hatshysy, «Bútin Qyrǵyzstan» partııasynyń basshysy Adahan Madýmarov ta baýyrlas qazaq pen qyrǵyzdyń qarym-qatynasyn eshkimniń sózi buza almaıtynyn aıtyp, Elbasy Nursultan Nazarbaevqa óz ótinishin bildirdi. Onyń bul málimdemesi «Youtube.com» beıne-portaly arqyly jarııalandy.
«Men múmkindikti paıdalanyp, Qazaq eline, Elbasyna, bútin túrik dúnıesiniń aqsaqaly atanǵan Nursultan Ábishulyna ótinish bildiremin. Árdaıym qyrǵyz-qazaq qarym-qatynasyn asyldaı ardaqtap, máýeli mámile jasap keldińiz. Sonyń bári bir kisiniń kesapatynan bútin jurtqa zııandy bolmasa eken degim keledi. Aıtqan kisiniń sózi men ózi kete bersinshi, biraq qalqaıǵan qalyń jurt zııan shekpese eken», degen A.Madýmarov osy málimdemesinde Elbasynyń «Qyrǵyzǵa mendeı kúıetin azamat menen keıin kele me, kelmeı me, bilmeımin» degen sózin eske alyp, Nursultan Ábishulynyń asqan sabyrlyq tanytyp otyrǵanyna aıryqsha rızashylyǵyn bildiredi.
Sondaı-aq «salqyn tartyp bara jatqan eki eldiń arasyndaǵy qarym-qatynasty qaıta bir pysyqtap qoısańyz» degen ótinishin jetkizedi. «Men resmı túrde osylaı qazaq bıligine ótinish bildiremin. Qudaı buıyrsa, bul kúnder ótedi. Bizdiń aramyzdy eshkim ajyrata alǵan emes. Jaratqan Alla ǵana ajyratpasa, qyrǵyz ben qazaqty eshkim ajyrata almaıdy. Ajyratamyz degenderdiń peıili tasqa urylsyn», deıdi A.Madýmarov.
