Rebrendıngtiń basty maqsaty – korporasııanyń barlyq qurylymdaryn zamanaýı úlgide damytyp, mazmundy, sapaly jobalardy arttyrý. Sondaı-aq, «QAZAQSTAN» korporasııasynyń quramyndaǵy arnalardyń ataýlary ózgerip, logotıpterdiń tústeri anyqtaldy.
Basqarma tóraǵasy Erlan Qarınniń aıtýynsha: «Barlyq arnalardyń logotıpterine ózgeris engizip, ár óńirdiń ózine ǵana tán tabıǵı-geografııalyq ataýlaryn qoldanýdy jón kórdik. Mysaly, buryn «Qazaqstan – Pavlodar», «Qazaqstan - Qaraǵandy», «Qazaqstan – Qyzylorda» jáne t.b bolyp atalsa, endi «ERTIS», «SARYARQA», «QYZYLORDA» bolyp ózgerdi. Jańa maýsym aıasynda aımaqtyq telearnalarda birqatar jańa baǵdarlamalar shyǵa bastady. Stýdııalardyń dızaıny jańaryp, ár túrli jobalardyń sany artty. Jalpy, bul bastama aımaqtardaǵy telearnalarǵa jańa lep, jańa serpilis qana berip qoımaı, qazaq televızııasynyń zamanaýı úrdisterge beıimdelip, ári qaraı damýyna jol ashady».
Jańa maýsym aıasynda barlyq aımaqtaǵy telearnalardy ár túrli baǵyttaǵy jalpy sany 96 baǵdarlama shyǵyp úlgerdi. Sol baǵdarlamalardyń qatarynda: bilim salasyndaǵy ınnovasııalar men respýblıkalyq, halyqaralyq olımpıadalarǵa qatysyp, jetistikke jetken jastar jaıly «Ertis óńiriniń ereńderi», qazaqtyń ulttyq qolónerine arnalǵan «Talǵam men tanym», aýyl men qalanyń tynys-tirshiligin salystyra otyryp, umyt bolyp bara jatqan: mal soıý, jilikteý, tabaq tartý, qymyz pisirý sııaqty qazaqy turmysty nasıhattaıtyn «Búk-shik» jáne basqa da kóptegen qyzyqty jobalar bar.
Aıta keteıik, osy jyldyń 28 tamyzynda, korporasııanyń jańa televızııalyq maýsymy aıasynda «QAZAQSTAN», «BALAPAN», «QAZSPORT» telearnalary elimizdiń memlekettik týy tústes ortaq logotıppen bekitilip, jańa formatta shyqqan bolatyn. Ulttyq arnada 10-nan astam jańa joba kórermenge jol tartty. Qazaqstannyń kópshilikke beımálim tarıhy týraly baıandaıtyn - «Kıeli Qazaqstan», elimizdiń áıgili adamdary jaıly syr shertetin - «Uly dala ulaǵaty» derekti fılmderi, halyqaralyq mýzykalyq - «Men qazaqpyn», «Silk way star» megajobalary, tabıǵattyń tylsym kúshi men qudiretin beıneleıtin - «24 saǵat tabıǵat qushaǵynda», kásipkerlikti nasıhattaıtyn - «Úmitker», sondaı-aq, qoǵamdyq-saıası, otbasylyq qundylyqtardy dáripteıtin, zamannyń suranysyna saı keletin realıtı - shoý janryndaǵy baǵdarlamalar jaryq kórdi.
