«26 qazan kúni Almaly HQKO bóliminiń basshysy bólim qyzmetkerimen birge Eńbek kodeksiniń baby boıynsha jumystan shyǵaryldy. Ol jektekshi retinde jaýapkershilikke tartyldy. Qazir onyń mindetin orynbasary Erlan Túlenov atqaryp otyr», deıdi «Azamattarǵa arnalǵan úkimet» memlekettik korporasııasy baspasóz hatshysynyń mindetin atqarýshy Tatıana Fomınova.
Esterińizge sala keteıik, Halyqqa qyzmet kórsetý ortalyǵynyń qyzmetkeri konsaltıng kompanııasynyń ókiline senimhatsyz anyqtama berip, zańdy buzǵan. «Azamattarǵa arnalǵan úkimettiń» baspasóz qyzmeti Anna Dmıtrıevıchtiń jeke málimetteri jarııa etilgenin moıyndady.
«Facebook áleýmettik jelisindegi jazbaǵa qatysty aıtarymyz, rasymen post avtorynyń atyna jyljymaıtyn múlik jáne mekenjaı anyqtamasy berilgen. Bul jaǵdaıda HQKO qyzmetkeri konsaltıng kompanııasynyń ókiline anyqtamany senimhatsyz bergen. Árıne, bul úlken zańbuzýshylyq, sondyqtan buǵan jol bergen qyzmetker jumystan shyǵarylady», dep jazylǵan memlekettik korporasııa taratqan habarlamada.
«Azamattarǵa arnalǵan úkimet» Memlekettik korporasııasy Anna Dmıtrıevıchten resmı túrde keshirim surap, bul oqıǵany jarııa etkeni úshin alǵys aıtty.
