– Erteń biz úshin eń qıyn oıyndardyń biri bolmaq. Sebebi makkabılikter Astanada ketken eseni qaıtarýǵa bilek sybana kirisetini belgili. Áıtkenmen, bizdiń jigitter pleı-off kezeńine shyǵý úshin erteń jeńiske jetý kerektigin jaqsy biledi. Sondyqtan shaıqasqa daıynbyz.
– Erteń «Makkabı» oıynshylary birden shabýyldaýǵa kóshetini aıtpasa da túsinikti. Osy taktıka sizdiń komandańyz úshin qolaıly bola ma?
– «Makkabı» óz alańynda ese jibermeıtin komanda. Astanadaǵy jeńilisi bizdi baǵalamaǵannan oryn aldy dep oılaımyn. Áıtpese, olar shabýyldaýdy jaqsy kóretin ujym. Eger de tepe-teńdikti saqtaı otyryp, nátıjeli qarymta jaýap berip otyrsaq, biz úshin oń nátıje beretini sózsiz.
– Jeksenbi kúni «Aıjaıyqpen» bolatyn oıyn sizdiń komandańyz úshin mańyzdy ma?
– Biz birinshi kezekte Qazaqstan chempıonatyn jeńip alýymyz kerek. Sodan keıingi maqsatymyz – Eýropa lıganyń toptyq kezeńinen shyǵý. Eki baǵytta óner kórsetip jatqandyqtan, jasyl alańda úsh kún saıyn aıqasýǵa týra kelip tur. Alty saǵat ary, alty saǵat beri ushý, eki kúnnen keıin qaıta jaýapty matchqa shyǵý jigitterge aýyr tıetini sózsiz. Biz ózimizge aýyr joldy tańdap aldyq. О́zimizge jeńil bolý úshin «Qaırattan» basym túsip chempıon ataný kerek edi. Alaıda, sol kúni almatylyqtardyń joly boldy. Endi jeksenbide «Aqjaıyqpen» ótetin matchta da barymyzdy salyp oınaımyz. Biraq, ol ekinshi másele. Birinshi kezekte erteńgi qıyn ári jaýapty kezdesýde qalaı da jeńiske jetýimiz kerek.
– Erteń komandańyz qandaı taktıkany qoldanady?
– Jeńiske jetý úshin saýatty qorǵanyp, shabýyldy nátıjeli aıaqtaý.
– Byltyrǵy jylǵy eýro dodanyń basty qaharmandarynyń biri Djordje Despotovıch jaraqatynan endi aıyǵyp, qatarǵa qosyldy. Sońǵy oıyndarda komandaǵa paıdasyn tıgizýge talpynyp jatqany kórinip-aq tur. Osy serb jigiti týraly ne aıtasyz?
– Úsh aı boıy emdelip, endi ǵana qatarǵa qosylǵan fýtbolshydan kóp eshteńe talap ete almaısyń. Qolynan kelse, Djordje komanda úshin biraz is tyndyra alady. Biraq, ázirge ol óziniń bıik deńgeıine jete alǵan joq.
– Negizgi oıynshylarynyń biri Iýrıı Logvınenkonyń komandaǵa kómektese almaıtyny sizdiń josparyńyzdy ózgertpeı me?
– Iýrıı Logvınenkonyń qatardan shyǵyp qalýy biz úshin úlken problema. Biraq, onyń ornynda top tebetin qorǵaýshylarymyz bar. Sondyqtan, josparymyz eshqandaı ózgermeıdi. Eger de kóńil-kúıimiz, jeńiske degen nıet bárinen bıik tursa, onda biz jeńiske jetýimiz ábden múmkin.
– Eger de «Astana» jeńiske jetse, sensasııa dep baǵalaýǵa bola ma?
– Jalpy, eýro dodada árbir jeńisiń sensasııaǵa baǵalanady. Al, erteń biz jeńiske jetsek, onda TOP sensasııaǵa jatqyzýǵa bolady.
Esterińizge sala keteıik, 2 qarashada Netanııa qalasynda ÝEFA Eýropa lıgasy toptyq kezeńiniń 4-týr aıasynda «Makkabı» men «Astana» komandalary Astana ýaqytymen 00:00-de alańǵa shyǵady.
Almas MANAP,
«Egemen Qazaqstan» –
Netanııadan (Izraıl)
