Foto: Azamat QASYM, «Egemen Qazaqstan»
Kabınetti ashýǵa uıytqy bolǵan, qajetti qural-jabdyqtarmen jabdyqtaýǵa 1 mıllıon teńge qarajattaryn aýdarǵan – osy mektepti 1978 jyly bitirgen túlekter. Osydan 40 jylǵa jýyq ýaqyt buryn bilim ordasynan qanat qaqqan túlekterdi búginde Almatyda turatyn Qanatbek Qajybekov pen Taldyqorǵanda eńbek etip júrgen Bolat Abaǵan syndy azamattar bastap kelipti.
«Qaıda júrsek te, qaı jerde qyzmet istesek te týǵan jerimizdi, ósken elimizdi, aýylymyzdy, bilim nárin sepken mektebimizdi eshýaqytta esten shyǵarǵan emespiz. Kez kelgen adamnyń júreginiń túkpirinde saqtalatyn, boıyna qýat berip, kóńiline shýaq shashyp turatyn sezimder bolady. Sonyń eń úlkeni, eń izgisi – týǵan jerge degen sezim bolsa kerek. HHI ǵasyr – aqparat ǵasyry, básekelestik ǵasyry. Sol básekelestikten shalǵaıdaǵy aýyl balalary da qalmasa eken degen tilekpen osyndaı ıgi isti qolǵa alǵan jaıymyz bar», - dedi «robot tehnıkasy» kabınetiniń ashylý rásiminde sóz alǵan osy mekteptiń túlegi, búginde Jetisý topyraǵynda qyzmet atqaryp júrgen belgili jýrnalıst, «О́lke tynysy» medıaholdıngi dırektorynyń orynbasary Bolat Abaǵan.
Jetiaral mektebiniń 1978 jylǵy túlekteriniń biri, kásipker Qanatbek Qajybekov ózderi ákelgen robottar bastaýysh jáne joǵary synyptarǵa arnalǵanyn, onyń keıbir jabdyqtaryn Sank-Peterbýrgten arnaıy aldyrǵanyn aıtady. «Aýyldaǵy sońymyzdan ergen baýyrlarymyz ben qaryndastarymyz úshin aıanatyn nesi bar dep eń sapaly robottardy tańdap, arnaıy baǵdarlamasy men nusqaýlyǵyn qosa ala keldik. Nusqaýlyqtyń ishinde barlyǵy muqııat jazylǵan. Onda 17 joba bar. Balalar sony qurastyrýy tıis. Osyny meńgerse elimizde ótetin jarystarǵa qatysa alady», - deıdi ol.
Jetiaralda byltyr ǵana ashylǵan 300 oryndyq mekteptiń fızıka pániniń muǵalimi Serik Aýǵanbaev jaqynda О́skemenge 15 kúndik oqýǵa baryp, robottarmen jumys isteýdiń qyr-syryna qanyǵyp kelipti. Bilgen-túıgenin oqýshylarǵa úıretýge ázir ekendigin jetkizdi. Saltanatty sharaǵa qatysqan aýdandyq bilim bóliminiń basshysy Samal Daýytbaeva «robot tehnıkasy» kabıneti Tarbaǵataıda eń alǵash bolyp Jetiaralda ashylǵanyn atap ótip, jaqynda arnaıy shtat bólinetindigin tilge tıek etti.
Qazirgi ýaqytta oblysymyzda «Týǵan mektep» atty aýqymdy aksııa júzege asyrylyp jatqany belgili. Shara aıasynda aımaqtaǵy barlyq bilim oshaqtaryn Nazarbaev ıntellektýaldy mektebi úlgisindegi fızıka, hımııa, bıologııa jáne «robot tehnıkasy» kabınetterimen jabdyqtaý josparlanǵan. Tarbaǵataı aýdanynyń ákimi Dildábek Orazbaev óńirdiń syrtta jáne oblys aýmaǵynda júrgen azamattary atalǵan aksııaǵa belsene qatysyp, 75 mıllıon, 270 myń teńge kóleminde qarajattaryn aýdarǵanyn aıtady. Bul qarjyǵa aýdandaǵy 17 mekteptiń synyptary jabdyqtalatyn bolady. «Aksııaǵa eńkeıgen káriden eńbektegen balaǵa deıin atsalysyp jatyr deýge bolady. Aqjar men Aqsýat aýyldarynda túlekter forýmyn ótkizdik. Forýmǵa árisi Almaty men Astanada, berisi О́skemen men Semeıde eńbek etip júrgen Tarbaǵataıdyń týmalary arnaıy keldi. Olardyń eline, jerine degen súıispenshilikterine tántimiz. Tipti 70-ke kelgen aqsaqaldar da «Men osy mektepti bitirip edim» dep qolda baryn ákelip, qoldaýyn bildirip jatyr», - deıdi aýdan ákimi.
D.Orazbaevtyń aıtýynsha, Tarbaǵataı aýdanynda 50-ge jýyq mektep bar. Sońǵy jyldary 8 jańa mektep salynyp, bilim oshaqtaryn jóndeýge 500 mıllıonǵa jýyq qarjy bólinipti.
Azamat QASYM,
«Egemen Qazaqtan»
Shyǵys Qazaqstan oblysy,
Tarbaǵataı aýdany
