1996 jyly Qazaqstan chempıony bolǵan «Taraz» ótken jyly da tyǵyryqqa tirelgen edi. Jaǵdaı áıteýir «Altaı» komandasynyń qujattary jaramsyz bolyp, ornyna premer-lıgaǵa «Taraz» jol tartty. Osy habardy aqpan aıynda estı sala apyl-ǵupyl sharýaǵa kirisken jambyldyqtar Voıt Talǵaevtyń biliktiligine senim artty. Tájirıbeli bapker 10 kúnniń ishinde komandany jasaqtady. Premer-lıgada oınaı alatyn jastardy tartyp, Túrkııadaǵy oqý-jattyǵý jıynynda shuǵyl túrde legıonerler shaqyrtty. Komandany, amal joq, ózge klýbtardan irikteýinen ótpegen aıaqdopshylardan suryptady. Mine, osylaısha komanda joǵarǵy topqa «top» ete tústi.
Chempıonat ortasynda tipti alǵashqy altylyqqa engen kezi de boldy. Keıinnen 7 men 8-shi oryndarǵa turaqtady. Deı turǵanmen keıinirek Talǵaevtyń komandasyna kóz tıdi. О́z alańyndaǵy oıyndardyń ózinde jeńile berip, qatarynan sátsizdikter serııasyna ushyrady. Jyǵylǵanǵa judyryq bolyp ÝEFA «Taraz» komandasynan 6 upaıdy alyp tastady. Oǵan kináli nıgerııalyq shabýylshy Odıta Obıora. Halyqaralyq uıymǵa hat jazyp, aılyǵymdy bermedi dep aryz túsirgen. Anyqtalsa rasymen de Odıtanyń 2015 jylǵa deıin kelisimsharty bolypty. Alaıda ony bapkerler 2014 jyldyń sońynda «komandaǵa keregiń shamaly» dep jyly shyǵaryp salǵan. Araǵa eki jyl salyp Obıora Qazaqstan kásipqoı lıgasyna shaǵym túsirgen. Komandadan ketken kezde tólenetin ótemaqyny suraǵan. «Taraz» fýtbol klýbynyń prezıdenti Mahambet Dúısembıev eshqandaı talassyz fýtbolshynyń suraǵan qarjysyn tólep bergen.
– Klýbty maǵan deıin basqarǵan Talǵat Ápsemetov fýtbolshynyń qandaı deńgeıde ekenin baıqamastan 3 jylǵa kelisimshart jasasqan. Legıoner alǵashqy jyly óner kórsetkennen keıin, sporttyq babyn joǵaltqan. Jańadan kelgen bapker Obıoranyń bolashaǵyna senim artpaǵan soń, komandadan ketýge májbúr bolǵan Nıgerııalyq fýtbolshy Eýropadaǵy ózge komandaǵa aýysady. Keıinnen kelisimshartyn aqtaryp júrip ótemaqysyn daýlaı bastaǵan. Sonyń saldarynan qazir «Taraz» fýtbol klýby zardap shegip otyr. Sol 6 upaı qazir bizdiń paıdamyzǵa jazylsa, biz premer-lıgadaǵy ornymyzdy saqtap qalar edik, – deıdi klýb basshysy Mahambet Dúısembıev.
Esterińizde bolsa, týra osyndaı jaǵdaıǵa tap bolǵan «Atyraý» fýtbol klýby chempıonat bastalar tusta 6 upaıynan aıyrylǵan edi. Mundaı oqıǵalardan keıin qazaqstandyq fýtbol klýbtarynan alashaǵy bar ózge de legıonerler ÝEFA-ǵa hat jazyp, daý týdyryp júrmese bolar edi deısiń.
Bıylǵy jyly «Taraz» oıynshylaryna 600 mln teńge kóleminde jalaqy tólense, keler jyly osy soma eki esege qysqaratyn túri bar. Birinshi lıgada óner kórsetetin komandaǵa tek 3 legıoner alýǵa ruqsat berildi. Demek ujymnyń negizin jergilikti jastar quraıdy degen sóz. Jastar demekshi, bıyl erekshe kózge túsken tarazdyq Erkebulan Seıdahmet Sankt-Peterbýrgten «Zenıt» komandasyna aýysýǵa daıyn otyr. Al Qazaqstan jastar quramasynyń sapynda jarqyraı kóringen Bahtııar Zaınýtdınovti de «Astana» fýtbol klýby satyp almaqshy.
– Zaınýtdınov «Taraz» fýtbol akademııasynyń túlegi. Jambyl jerinen jyl saıyn osyndaı bir fýtbolshy jarqyrap shyǵyp jatady. Ulttyq quramalar deńgeıine kóterilgen jas talantqa osy kúni elimizdiń 4 dúrkin chempıony, «Astana» komandasy quda túsip otyr. О́zimiz tárbıelegen fýtbolshynyń transferlik quny shamamen 20 mıllıon teńge. Eger elordalyq ujym kelisse, fýtbolshynyń odan ári damyp, joǵarǵy deńgeıge kóterilýine qarsy emespiz, – deıdi Mahambet Dúısembaev.
Al endi jambyldyq komanda kelesi maýsymǵa maqsat qoıyp, premer-lıgaǵa qaıta oralýdy kózdeıdi. Qazirgi bapker Voıt Talǵaevqa taǵy da usynys aıtyldy. Bilikti bapker komandany jattyqtyrýǵa qarsy emes sekildi.
Ermuhamed MÁÝLEN,
«Egemen Qazaqstan».
