Foto: Aqorda
Memleket basshysy Qazaqstan men álem alpınızminde aty ańyzǵa aınalǵan tulǵamen júzdeskenine qýanyshty ekenin jetkizdi.
«О́zińizdiń zor qajyr-qaıratyńyz ben asa joǵary kásibıligińizdiń arqasynda Qazaqstan Respýblıkasynyń kók Týy Jer sharynyń asý bermes asqarlarynda jelbiredi. Álemniń eń bıik núktelerin baǵyndyrǵan tájirıbeli shyńǵa órmeleýshi, halyqaralyq týrnırlerdiń jeńimpazy retinde dúnıe júzine dańqyńyz jaıyldy. Everestke shyǵyp, bedeldi «Jeti shyń» klýbyna múshe bolǵan alǵashqy qazaqstandyq atandyńyz. Sizdi elimizde alpınızm mektebiniń negizin qalaýshy retinde qurmetteıdi. Otandyq mektep Qazaqstannyń jahandyq brendine aınaldy. Talap men tártipti qatar qoıatyn talantty bapkerden bir shoǵyr alpınıst-sportshylar tálim aldy. Olardyń qatarynda álem rekordyn jańartqan, chempıon atanǵan, halyqaralyq alpınızm qozǵalysynyń elıtasyna kirgen myqtylar barshylyq. Bapkerlikpen shuǵyldanǵan ýaqyt ishinde júzden astam sport sheberin daıarladyńyz. Shákirtterińizdiń arasynda halyqaralyq dárejedegi sport sheberleri, tipti, eńbek sińirgen sport sheberleri de bar. Sizdiń jetekshiligińizben Qazaqstan quramasy álemde birinshi bolyp bıiktigi 8 myń metrden asatyn barlyq 14 shyńǵa shyqty. Munyń ózi biregeı jetistik sanalady. Sportshylarymyz alpınızmniń siz qalyptastyrǵan dańqty dástúrin jalǵastyryp, kóptegen halyqaralyq saıystan tabysty oralyp júr», dedi Prezıdent.
Qasym-Jomart Toqaev Ervand Tıhonovıchtiń asyl qasıetteri men adamdarǵa, ásirese, alpınısterge degen shynaıy qamqorlyǵyn joǵary baǵalady.
«Adam ómiri eń joǵary sporttyq jetistikterden qundy» degen teńeýińiz alpınıster arasynda qanatty sózge aınalyp ketti. «Alpınızm – adam men tabıǵat arasyndaǵy shahmat oıyny» dep dál aıtqansyz. K2 (Chogorı) shyńyn betke alǵan komandańyzdyń alaı-túleı boranǵa tap bolǵany málim. Sol sátte shyńnyń ushar basyna qol sozym jer qalǵanyna qaramastan, keri qaıttyńyz. Mundaı sheshim qabyldaý ońaı emes. Osydan-aq dana, meıirban jan ekenińizdi ańǵaramyz. Jetistik pen jeńiske eshqashan masattanǵan emessiz. Bárine belgili, úırenshikti baǵyttarmen júrgende de saqtyqty umytpadyńyz. Kez kelgen joryqqa osylaı tyńǵylyqty daıyndalý dańqty alpınıst, sportshy, tálimger retinde sizdiń «tólqujatyńyzǵa» aınaldy», dedi Memleket basshysy.
«Asqar shyńdarǵa qushtarlyq, taýǵa shyǵý – áýestik qana emes, qorshaǵan ortany qasterlep, lastamaýǵa úndeıtin aıryqsha ekologııalyq ómir salty. Jańa Konstıtýsııada kórinis tapqan tabıǵatty aıalaý, ekologııalyq mádenıet jáne tazalyq qaǵıdattary ulttyq bolmysymyzben bite qaınasyp ketýge tıis. Taý tabandylyqqa, tártip pen janashyrlyqqa úıretedi. Bıikke kóterilgen adam rýhtanady. Dál osy sebepti alpınızm men taý týrızmin naǵyz ómir mektebi dep ataýǵa bolady. Ol myqtylardy shyńdaıdy, óz ortańda jaýapty bolýǵa baýlıdy. Bul mádenı ári psıhologııalyq fenomendi barynsha qoldap, ony jastar tárbıesinde paıdalanýymyz kerek. Úkimettiń, salalyq mınıstrliktiń aldynda alpınızmdi sport jáne zamanaýı taý týrızminiń bir túri retinde jan-jaqty dáripteý mindeti tur. Memleket pen demeýshilerdiń qarjysyn tarta otyryp, naqty is-qımyl baǵdarlamasyn ázirleý qajet. Memleket bul ózekti mindetti sheshýdi qolǵa alady, oǵan tıisti nazar aýdarylady», dedi ol.Qasym-Jomart Toqaev Ervand Tıhonovıchtiń ǵumyr jolyn jasampaz patrıotızmniń, aıryqsha janqııarlyq pen asa joǵary kásibıliktiń jarqyn úlgisi dep sanaıdy.
«Jastar tabandy ári ónimdi eńbek árdaıym laıyqty baǵasyn alatynyn kórýge tıis. Tabystyń ońaı kelmeıtinin túsingeni jón. Eńbek – bárin jeńbek. Meıli, sportta, bızneste, bilimde, ǵylymda, dalalyq jumysta ne zaýytta bolsyn, óz isine shyn berilgen, kózdegen maqsaty aıqyn adamdar ómirlik muratyna jetedi. Qurmetti Ervand Tıhonovıch Ilınskıı sııaqty azamattar – qoǵamnyń tiregi, erlik pen eńbekqorlyqtyń, tózimdiliktiń jarqyn úlgisi. Sondyqtan men sizge alpınızmdegi asa úzdik jetistikterińiz, sondaı-aq el sportynyń damýyna qosqan eleýli úlesińiz jáne belsendi qoǵamdyq qyzmetińiz úshin joǵary erekshelik belgisi – «Qazaqstannyń Eńbek Eri» ataǵyn berý týraly sheshim qabyldadym. Búgin osy nagradany ózińizge zor qurmetpen tapsyramyn. Ervand Tıhonovıch, sizge myqty densaýlyq, baq-bereke, mol tabys tileımin! Alpınıster arasynda «О́zińizdi saqtańyz!» degen sóz jıi aıtylady. Sizge jáne janyńyzda júrip, serik bolǵan shákirtterińizge osy tilekti arnaǵym keledi», dedi Qasym-Jomart Toqaev.Ervand Ilınskıı atqarǵan qyzmetine joǵary baǵa berip, otandyq alpınızmge aıryqsha kóńil bólgeni úshin Qasym-Jomart Toqaevqa alǵys aıtty.
«Muny Qazaqstan alpınıster qaýymy jetken jetistikterdiń memleket deńgeıinde tanylýy dep túsinemin. Shyn máninde, bizdiń tabysymyzdy sheteldik alpınıster de moıyndaıdy. Osyǵan kýá bolǵanyma qýanyshtymyn», dedi ulttyq quramanyń tálimgeri.
