Bul – «QazMunaıGaz» UK» AQ pen qytaılyq CNPC korporasııasy arasyndaǵy áriptestik negizinde júzege asyrylǵan iri ınvestısııalyq joba.
Tuńǵysh Prezıdent kúnine oraılastyrylǵan jańa qondyrǵynyń ashylý saltanaty №1 KS pen Astanadaǵy ulttyq operator «QazTransGaz» kompanııasynyń Biryńǵaı dıspetcherlik ortalyǵymen tikeleı baılanys arqyly ótti. Is-sharaǵa sondaı-aq tasymaldaý beketiniń mamandary, buqaralyq aqparat quraldarynyń ókilderi qatysty. Tikeleı baılanysta aldymen sóz alǵan «QazMunaıGaz» UK» AQ kompanııasy gaz tasymaldaý jáne marketıng jónindegi atqarýshy vıse-prezıdenti Qaırat Sháripbaev bul ınfraqurylymdyq jańa nysan gaz qubyrynyń «S» tarmaǵynyń ónimdiligin arttyrýǵa jáne tasymal kólemin jylyna 25 mıllıard tekshe metrge deıin jetkizýge múmkindik beretinin atap ótti.
«Elbasynyń 2020 jylǵa deıin kólik-tranzıttik tasymal qýatyn eki esege arttyrý jónindegi tapsyrmasyna sáıkes gaz salasynda oń qadamdar jasalýda. «Qazaqstan – Qytaı» magıstraldy gaz qubyrynyń kezekti stansasyn iske qosý arqyly elimizdiń gaz tasymaldaý júıesin jetildirýge úlken úles qosyldy, dedi ol.
Jalpy, búgingi kúni eldiń gaz salasy is júzinde tolyqtaı jańartyldy jáne qazirgi zamanǵy eń ozyq jabdyqtarmen jasaqtalǵan. Nysandy paıdalanýǵa engizýmen Qazaqstan shyǵystyq gaz tranzıtin eki esege arttyrýǵa qol jetkizdi.
Jańa nysan ótkizý qabileti men uzyndyǵy boıynsha eń iri sanalatyn «Ortalyq Azııa – Qytaı» transulttyq gaz qubyrynyń quramdas bóligi bolyp tabylady. Bul qubyr tórt memleketti – Qazaqstan, Túrikmenstan, О́zbekstan, jáne Qytaıdy baılanystyryp otyr.
«Azııalyq Gaz qubyry» JShS bas dırektorynyń birinshi orynbasary Ǵalymjan Saǵyntaevtyń pikirinshe, «S» jelisinde 8 kompressorlyq stansa bar bolsa, sonyń tórteýi 2016 jyly iske qosylǵan. Ekeýi bıyl iske qosylsa, endigi jylǵa taǵy da eki kompressor stansasy jumys isteı bastaıdy. Sonda 2018 jyldan bastap «A», «V» jáne «S» jelileri arqyly josparlanǵan 55 mlrd tekshe metr ortaazııalyq gaz Qytaıǵa qaraı tasymaldanbaq. Onyń ishinde 5 mlrd tekshe metr Qazaqstannyń gazy eksporttalady.
Jańa kompressorlyq stansada zamanaýı jabdyqtar ornatylǵan. Munda ornatylǵan «Roolls Royse» kompanııasynyń gaz aıdaýshy agregattarynyń jobalyq qýaty saǵatyna 516 myń tekshe metr gaz aıdaýǵa arnalǵan.
Paıdalanylǵan ınnovasııalyq jabdyq, sondaı-aq qosalqy tehnologııalar kesheni magıstraldy gaz qubyryn paıdalanýdyń barlyq kezeńi ishinde qaýipsiz jáne tehnologııalyq úzdiksiz gaz tasymaldaýdy qamtamasyz ete alady. Perspektıvada KS-1 kompressorlyq stansasy, eger qajettilik týyndasa, gaz tranzıtiniń kólemin ulǵaıta alady. Ol úshin tehnologııalyq parametrleri boıynsha salynýy múmkin tórtinshi «D» jelisine kompressorlyq stansany qosymsha qosý kózdelgen.
Baqtııar TAIJAN,
«Egemen Qazaqstan»
Ońtústik Qazaqstan oblysy
