Zaldyń orta shenine ilingen peızajdar toptamasy taıaýda týǵan dúnıeler. Sáýletti landshaft pen bir boıaýdyń qubylǵan nesheme óńi bir mezette jaǵany urǵan teńiz tolqynyndaı túrlene túsedi. «Bulttar men taýlar» dıptıhinen, «Dóń ústinde», «Skıf eldi mekenderi» serııasynan amerıkalyq ataqty sýretshi Rotkonyń abstraktili boıaýlarymen úndestigi baıqalatyndaı. Al Leıla obraz jasaýda qaısarlyq pen erik-jigerdi, ýaqyt pen ólshemdi zańǵar bıikten, máńgi alasarmaıtyn aspannan izdeıdi.
Leılanyń tereńdikke tunǵan álem týraly paıymynyń kishkentaı bólshegi, ásirese «Kógildirdiń tústeri», «Qulannyń túrli tústeri» atty toptamasynan anyq kórinedi.
«Bul týyndylar sońǵy 2-3 jyl kóleminde dúnıege kelgen. Kórmeniń negizgi ózegi Qazaqstannyń mádenıetimen, tamyrly tarıhymen astasyp jatyr. Qulan óte bir qyzyq janýar, turqy shaǵyn kelgen osy bir dala taǵysyna keıbiri shúbá keltirip jatady. Meni tańǵaldyratyny, bul janýardy qolǵa úırete almaısyń. Degenmen olar tabıǵat aıasynda bir-birimen qoǵamdasa, juptasyp ómir súredi. Men úshin qulan – bostandyq sımvoly, azattyqtyń kórinisi», deıdi sýretshi.
Leıla Mahat kásibı sýretshi ǵana emes, Beıneleý óneri jáne syzý mamandyǵy boıynsha fılosofııa doktory, Qazaq ulttyq óner ýnıversıtetindegi «Kórkem sýret jáne músin» kafedrasynyń dosenti, tálimger. Sýretshi qoltańbasy sheteldik ónertanýshylarǵa da keńinen tanylǵan. Atap aıtqanda, Túrkııa Mádenıet mınıstrliginiń beıneleý óneri mýzeıinde, Moldova memlekettik beıneleý óneri mýzeıinde, Germanııanyń Mıýnhen qalasyndaǵy «Art 21», Berlındegi «Saraı» galereıasynda, sondaı-aq Japonııa, Aýstrııa, Qytaı Halyq Respýblıkasy, Belgııa, Úndistan syndy elderdegi óner ortalyǵynda shyǵarmashylyq toptamalary ornalasqan.
Aıa О́MIRTAI,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»
