Ashyǵyn aıtý kerek, «100 naqty qadam» Ult jospary memlekettiń jáne eldiń ár azamatynyń hal-ahýalyn jaqsartýǵa arnalǵan úlken baǵdarlamalyq qujat bolyp tabylady. Onyń máni men maǵynasy tereńde jatyr. Munda memlekettik salalarǵa tek Ult josparyndaǵy basty mindetterdi oryndap qoıý ǵana emes, jetistikke qaraı jasalǵan ár qadamnyń naqty jemisin qarapaıym adamdar kórýge tıistiligi qozǵaldy. Ár qadamnyń oryndalýy – damýdyń, kórkeıýdiń kórinisine aınaldy. Sóıtip baǵdarlamanyń kózdegeni kóńilden shyqty dep tolyq aıta alamyz. Al «Halyq aıtsa, qalt aıtpaıdy» degendeı, Ult josparynyń oryndalǵan qadamdarynyń nátıjesi kóńilden shyǵyp jatqany basa aıtylýda.
Máselen, qazirgi kúnde ár adam óz kásibin dóńgeletýi tıis. Al kásiptiń nesibesin kórý úshin ár kásipker alańsyz qyzmet ete alýy kerek. Mine, osy oraıda zańnyń ústemdigi adal eńbek etemin, onyń qyzyǵyn kóremin deıtin adamdarǵa aýadaı qajet. Bir sózben aıtqanda, menshik quqyǵyna kepildik beretin, kásipkerlik qyzmet úshin, kelisim-sharttyq mindettemelerdi qorǵaý úshin jaǵdaı jasaıtyn, túptep kelgende ekonomıkalyq ósim úshin negiz bolatyn zańnyń ústemdigi qamtamasyz etilýi qajet. Ol qalaı júzege aspaq? Jalpy, zań ústemdigi degende biz neni basshylyqqa alamyz? Árıne, Negizgi Zań – Konstıtýsııanyń orny bólek. Onda jazylǵandaı, adamnyń quqyqtary men bostandyqtaryn zańdy túrde qorǵaı bilý, adamdy qadirleý, ony eń qymbat qazyna dep bilý qajet. Budan shyǵatyn qorytyndy, zańnyń ústemdigi adamnyń menshik quqyǵymen, jeke kásipkerlik qyzmetimen, ıaǵnı onyń is júzine asýymen ushtasýy tıis. Sonda jeke kásipkerlik nátıjesi memlekettiń ekonomıkalyq damýyna dem beredi. Al bul adamdardyń, eldiń jalpy ál-aýqatynyń artýyna, memlekettiń ekonomıkalyq jaǵdaıynyń jaqsarýyna jol ashady. Memleket basshysy Ult josparyndaǵy zańnyń ústemdigi týraly aıtqanda, osy máseleni alǵa qoıǵany anyq.
Endeshe adamnyń jeke quqy men zańdy menshik quqy naqty qorǵala alatyn jaǵdaıda adam bostandyǵy saqtalatyndyǵy aıqyndalyp, bul qazaqstandyq quqyqtyq júıeniń saltanat qurýynyń bir belgisi bolmaq. Al azamattar men uıymdardyń, kásipkerlerdiń quqyqtary men bostandyqtaryn, zańdy múddelerin qorǵaý jáne ony qamtamasyz etý sot júıesiniń mindeti bolyp tabylatyndyǵy joǵaryda aıtylǵan Ata Zańymyzda jazylyp tur. Demek, zań ústemdiginiń saltanat qurýyn is júzine asyrý barysynda sottardyń róli de, orny da bólek. Bul oraıda, aldymen, sýdıalarǵa júkteler jaýapkershilik úlken.
Sondyqtan sýdıa bolyp taǵaıyndalmas buryn oǵan úmitker adam quqyqtyq jaǵynan damyǵan elderdegi qatań tájirıbe tártibindeı kúrdeli ári kóp satyly synaqtardan ótedi. Máselen, sýdıa túıini qıyn máselelerdi sheshe alatyn bilikti de bilimdi maman bolyp kelýi kerek. Sol úshin de Prezıdent janyndaǵy memlekettik basqarý akademııasynyń quramyna enetin Sot tóreligi ınstıtýtynda joǵary zań bilimin berý mekemeleriniń sýdıalyq qyzmetke laıyqty túlekteriniń arnaıy eki jyl bilim alýy kózdelgen bolatyn. Endi bul ınstıtýt akademııa quramynan shyǵarylyp, Joǵarǵy sottyń janynda jumys isteıdi. Magıstranttar munda eki jyldyq bilim alady. Sosyn bir jyl sottarda taǵylymdamadan ótedi. Synaq munymen shektelmeıdi. Túlek sottarda taǵy bir jyl synaq merziminen ótedi. Sóıtip magıstranttar sýdıa bolyp taǵaıyndalǵansha bilim de, naqty sot tájirıbesin de jınap alady. Mine, mundaı sýdıalar qatań irikteý men ozyq oqytý úlgisinen ótkennen keıin adam quqyn qorǵaýda árqashan zań ústemdigin joǵary qoıatyndyǵy sózsiz. О́ıtkeni Memleket basshysynyń «100 naqty qadam» Ult josparyndaǵy kózdelgen meje de osy bolatyn.
