Syrtqy saıasaty ulttyq qaýipsizdikti nyǵaıtý, aımaqtyq jáne halyqaralyq turaqtylyqty qamtamasyz etý syndy mańyzdy strategııalyq basymdyqtarǵa negizdelgen Qazaqstan álemdik arenadaǵy óz mindettemelerin júzege asyrýda BUU, EQYU, ShYU, IYU jáne UQShU sekildi bedeldi uıymdarmen birlese jumys isteýde. Sondaı-aq halyqaralyq jáne aımaqtyq birlestikterge tóraǵalyq etýde tájirıbesi mol Qazaqstan jahandyq syn-qaterlerdiń aldyn-alýǵa qatysty oń bastamalardyń kún tártibine shyǵarylýyna muryndyq bolyp júr. Elimizdiń osy ispettes álemdik aýqymdaǵy is-qımyl úderisi 2018 jyly qańtarda BUU Qaýipsizdik Keńesine tóraǵalyq etetindigimen jańa sıpatqa ıe bolady dep kútilýde ári bul baǵyttaǵy, ıaǵnı halyqaralyq qaýipsizdikti nyǵaıtýǵa baılanysty sharalardyń ońtaıly júzege asýyna Qazaqstannyń UQShU-ǵa aldaǵy ýaqytta jetekshilik jasaýy da zor yqpalyn tıgizetinine senim bildirilýde.
Tashkent qalasynda 1992 jylǵy 15 mamyrda qol qoıylǵan Ujymdyq qaýipsizdik týraly sharttyń negizinde 2002 jyly, dáliregi osydan 15 jyl buryn shartqa qatysýshy elder UQShU-ny birlestik retinde qurý jóninde sheshim qabyldaǵan bolatyn. Búginde UQShU álemdik qoǵamdastyqtan oń baǵasyn alyp, bedeldi uıymdar qatarynan ózindik ornyn tapqan. Onyń mundaı deńgeıge kóterilýine Qazaqstan Prezıdenti Nursultan Nazarbaevtyń tarapynan engizilgen usynystardyń oń áserin tıgizgenin erekshe atap kórsetýimiz kerek.
Búginde UQShU elimizge sheteldik qarý-jaraqtardy, áskerı tehnıkalardy jeńildikpen satyp alýǵa jol ashýda. Bul – el qarjysyn únemdeı otyryp, áskerı kúshterimizdi, quqyq qorǵaý organdaryn sońǵy úlgidegi qarý-jaraqtarmen jáne tehnıkamen jabdyqtaýǵa berilgen ońtaıly múmkindik. Ásirese, UQShU sheńberinde kópjyldyq Áskerı-ekonomıkalyq yntymaqtastyq baǵdarlamasy bekitilgenin, sonyń nátıjesinde qarý-jaraqtar men áskerı tehnıka salasynda qyzmet kórsetýge arnalǵan ortalyqtardyń júıesin qurý iske asyrylyp jatqanyn erekshe atap ótken jón. Atalǵan jaǵdaıat otandyq áskerı ónerkásiptiń áleýetin arttyrýǵa, elimizdiń áskerı qyzmetshilerin Reseı men Belarýstiń áskerı joǵary oqý oryndarynda aqysyz nemese jeńildikpen oqytýǵa, sondaı-aq Armenııa, Qyrǵyzstan men Tájikstannyń áskerıleriniń elimizge kelip oqýyna múmkindikter beredi.
Uıym aıasynda bitimgershilik kúshterdi, quqyq qorǵaý organdaryn, sondaı-aq TJM organdarynyń arnaıy maqsattaǵy bólimshelerin qamtıtyn ujymdyq qaýipsizdik júıesi jumys istep tur. Atalǵan bólimsheler túrli jattyǵý sharalaryna qatysyp, ózderiniń deńgeıin kóterýde.
Qazirgi tańda UQShU halyqaralyq terrorızm men dinı ekstremızmge qarsy kúreske jiti kóńil aýdaryp otyr. Qazaqstan tarapynyń belsendi is-qımylynyń nátıjesinde halyqaralyq terrorızmge qarsy kúreske qatysty is-sharalardyń tizbesi qabyldanyp, terrorıstik dep tanylǵan uıymdardyń tizimi bekitildi. Sonymen qatar UQShU-nyń esirtkige qarsy strategııasy naqtylandy.
Negizinde, UQShU sheńberinde ótkiziletin árbir shara elimizdiń qaýipsizdigin nyǵaıtýǵa, aımaqtyq turaqtylyqty qamtamasyz etýge zor áserin tıgizýde. Aldaǵy ýaqytta osy baǵyttaǵy jumystar qarqyn alatyny Mınskide uıymdastyrylǵan mereıtoılyq sessııada aıqyndala tústi. Osy oraıda Prezıdent N.Á.Nazarbaev atap kórsetken basym baǵyttardyń mańyzy zor. Tarata aıtar bolsaq, Elbasy Qazaqstannyń UQShU-ǵa tóraǵalyq jasaıtyn kezeńde uıymǵa múshe elderdiń áskerı saladaǵy ózara is-qımyl aýqymyn ulǵaıtý, tájirıbelik áskerı-tehnıkalyq yntymaqtastyqty nyǵaıtý, birlestiktiń lańkestikke qarsy kúrestiń jahandyq júıesin qalyptastyrýǵa atsalysýyn qamtamasyz etý, múshe memleketterdiń kıberqaýipsizdigine tóngen qaýipterge qarsy jumyla áreket etý, zańsyz esirtki aınalymyna qarsy kúresti kúsheıtý syndy baǵyttarǵa basa mán beriletinin naqty kórsetip berdi.
Endi, aldaǵy ýaqytta ózekti máseleler qamtylǵan osy basymdyqtar UQShU sheńberinde basshylyqqa alynyp, júıeli jumystar júrgiziletin bolady.
Aıta keteıik, UQShU Ujymdyq qaýipsizdik keńesiniń kezekti sessııasy 2018 jyldyń ekinshi jartyjyldyǵynda Astanada ótpek.
