Zertteý áleýmettik osal toptardyń (ómiri aýyr áıelder, kámeletke tolmaǵandar, balalar úıleriniń túlekteri, jazaǵa kesilgender) kepildendirilgen memlekettik zańgerlik kómekke qol jetimdiligine kedergilerdi anyqtaý men saraptaý maqsatynda Qazaqstannyń 7 oblysynda júrgizildi: Almaty, Batys Qazaqstan, Jambyl, Qaraǵandy, Pavlodar, Ońtústik Qazaqstan jáne Shyǵys Qazaqstan oblystary.
Zertteý nátıjelerine súıensek, áıelderdiń 65 paıyzy kúıeýiniń tarapynan álimjettike ushyrap, taıaq jep otyrǵan. Suralǵan balalar úıi túlekteriniń jartysynan astamy (55%) baspana, zeınetaqy, járdemaqy alý jáne muragerlikke ený máseleleri boıynsha tegin quqyqtyq kómekke muqtajdyqtaryn atap ótken. Zertteý jazaǵa kesilgenderdiń basym kópshiligi (62%) bas bostandyǵynan aıyrý oryndarynda túrli quqyqtyq máselelerdiń sheshilýine zárý ekendigin anyqtap otyr.
«Bilikti zańgerlik kómek alý quqyǵy – negizgi ári kúrdeli másele. Bilikti zańgerlik kómektiń barlyq azamattyq toptarǵa, ásirese, álsizderge qoljetimdi bolýy mańyzdy. Osal toptarmen jumys jasap kele jatqan jyldar ishinde men MKZK qazirgi júıesiniń jetilmegendigine jıi tap bolýdamyn. Bizge osal toptaǵy adamdardyń sot ádildigine qol jetimdiligine keltiriletin kedergilerdi zertteý jáne olardyń qanshalyqty kómekke zárý ekendikterin túsiný mańyzdy boldy», – deıdi "Taldyqorǵandyq quqyq qorǵaý ortalyǵy" QQ dırektory Vıktor Ten.
Jobanyń negizgi maqsaty osal toptardyń quqyqtaryn qorǵaýdyń tájirıbesi men tetikterin jetildirý, sonyń ishinde olardyń qylmystyq jáne azamattyq ádilettilikke tartylǵan jaǵdaılarda memleketpen kepildendirilgen zańgerlik kómektiń (MKZK) sapasy men qoljetimdiligin jaqsartý bolyp tabylady.
Aınash ESALI,
«Egemen Qazaqstan».
ALMATY
