Otandyq delegasııany Syrtqy ister mınıstri Qaırat Ábdirahmanov basqaryp, onyń baıandamasy Keńestiń birinshi plenarlyq otyrysyn ashty. Otyrys qatysýshylaryna joldaǵan úndeýinde ol Qazaqstan Prezıdentiniń belsendi qyzmetiniń arqasynda Uıymnyń HHI ǵasyrda qabyldanǵan jalǵyz saıası qujaty – 2010 jylǵy EQYU Sammıtiniń Astana deklarasııasynda belgilengen ıdeıalary men qaǵıdattardyń ózektiligi saqtalatynyn atap ótti.
Q. Ábdirahmanov áriptesteriniń nazaryn jalpyǵa ortaq dıalog pen janjaldy jaǵdaılarǵa birlese jaýap qaıtarý jáne olardyń aldyn alý boıynsha kelisilgen is-sharalardy júzege asyrýdy jalǵastyrýdyń mańyzdylyǵyna aýdarypty. Sonymen birge, Qazaqstannyń basymdyqtary BUU Qaýipsizdik Keńesiniń turaqty emes múshesi jáne Eýrazııa aýmaǵyndaǵy medıasııa áreketteri retinde anyqtalady.
Otandyq dıplomat Jahandyq lańkestikke qarsy koalısııa men Terrorızm men ekstremızmge qarsy jahandyq is-qımyl boıynsha áreket kodeksin qurý týraly Prezıdent Nursultan Nazarbaevtyń negizgi bastamalaryn usynyp, EQYU-nyń ShYU, UQShU jáne 2018 jyly Qazaqstan tóraǵalyq etetin Azııa keńesimen ózara yqpaldastyǵyn nyǵaıtý úshin naqty qadamdardy iske asyrýǵa shaqyrdy.
Mınıstr aǵymdaǵy jáne bolashaqtaǵy qaýipsizdik salasyndaǵy áskerı syn-tegeýrinder boıynsha qurylymdy dıalogtyń bastalǵanyn joǵary baǵalady. Bul mehanızm senimdi qalpyna keltirý jáne áskerı belsendiliktiń, áskerler konsentrasııasynyń jáne onyń saldary retinde áskerı oqıǵalar qaýpiniń ósýine jol bermeý maqsatynda EQYU aýmaǵyndaǵy qarý-jaraqqa baqylaý jónindegi dıalogty iske qaıta qosý úshin arnalǵan. Elimizdiń oǵan belsendi qatysýyna ázirligi rastaldy.
Qazaqstan tarapynyń pikirinshe, EQYU sheńberinde pátýa, turaqtylyq pen yntymaqtastyqty qurý boıynsha Uıymnyń ekonomıkalyq-ekologııalyq ólshemi de syndarly ról atqarýy tıis. Bul baǵytty odan ári damytýdyń negizi – Prezıdent N.Nazarbaevtyń bastamalaryna tolyǵymen sáıkes keletin jahandyq jáne óńirlik ıntegrasııalyq úrdisterdi biriktirý bolýy múmkin.
Sonymen qatar, Q. Ábdirahmanov EQYU-nyń Bas hatshysy Tomas Grımıngerdiń taqyryptyq mıssııalardy qurý jónindegi bastamasyn quptady. Bul turǵyda Qazaqstan syrtqy saıası vedomstvosynyń basshysy EKSPO-2017 alańyn Astanada «EQYU-nyń ózara baılanys jáne jasyl ekonomıka jónindegi Ortalyǵyn» ornalastyrý úshin qoldanýdy usyndy.
Qazaqstan Syrtqy ister mınıstriniń tóraǵalyǵymen ótetin SIMK qarsańynda taraptar EQYU-nyń kún tártibindegi tásilder jáne eki uıym arasyndaǵy yntymaqtastyqtyń ózekti máseleleri boıynsha pikir almasý oryn alǵan UQShU-ǵa múshe-memleketter syrtqy ister mınıstrleriniń beıresmı kezdesýi ótti. Mundaı yntymaqtastyqtyń yqtımal baǵyttary retinde Qazaqstan, UQShU-ǵa tóraǵalyǵynyń óziniń basymdyqtary turǵysynda, terrorızm, kıberqaýipsizdik jáne zańsyz esirtki aınalymyna qarsy kúreske erekshe nazar bólýdi usyndy.
Birinshi kúni SIMK aıasynda Q.Ábdirahmanov Aýstrııa, Italııa, Makedonııa, Mońǵolııa, Nıderland, Estonııa men Eýropalyq Odaq delegasııalarynyń basshylarymen ekijaqty kezdesýler ótkizip, áriptesterimen ekijaqty jáne kópjaqty yntymaqtastyqtyń ózekti máselelerin talqylady.
Eýropalyq seriktestermen oryn alǵan pikir almasýlar barysynda otandyq dıplomat Qazaqstan men Eýropa elderiniń azamattary arasyndaǵy baılanystardy nyǵaıtý, onyń ishinde vızalyq rejımdi jeńildetý qajettigin atap ótti.
EQYU-nyń is basyndaǵy tóraǵasy – Aýstrııanyń Syrtqy ister jáne ıntegrasııa mınıstri Sebastıan Kýrspen kezdesýi barysynda Qazaqstan-Aýstrııa qarym-qatynastarynyń búkil máseleleri boıynsha pikir almasý oryn aldy. Erekshe nazar saýdany ártaraptandyrý múmkindikterine qoıylyp ekonomıkalyq yntymaqtastyqtyń damýyna, sondaı-aq quqyq qorǵaý organdary arasyndaǵy tikeleı baılanys ornatýdy, ekijaqty kelisimderge qol qoıý jáne Qazaqstannyń Eýropa Keńesiniń quqyqtyq quraldaryna qosylýdy qamtıtyn quqyq salasyndaǵy yntymaqtastyqqa aýdaryldy.
Sonymen qatar, Q.Ábdirahmanov S. Kýrs basqaryp otyrǵan Aýstrııalyq halyq partııasynyń bıylǵy qazan aıynda parlamenttik saılaýyndaǵy jeńisimen quttyqtady jáne úkimet qalyptastyrýda tabystar tilep, Qazaqstanǵa saparmen kelýge shaqyrdy.
Eýropalyq Odaq Syrtqy saıası qyzmetiniń Bas hatshysy Helga Shmıtpen jahandyq kún tártibi boıynsha kólemdi áńgime boldy. Dıplomattar Irannyń ıadrolyq baǵdarlamasy jónindegi birlesken keshendi is-qımyl josparyn júzege asyrý máselelerin, Taıaý Shyǵys jáne Aýǵanstandaǵy ahýaldy egjeı-tegjeı qarastyrdy. Eýropalyq tarap Qazaqstan Prezıdentiniń ıadrolyq qarýdy taratpaý jáne qarýsyzdaný salasyndaǵy kúsh-jigerin, sondaı-aq eýrazııalyq qurlyǵyndaǵy janjaldy jaǵdaılardy retteý úderisindegi rólin atap ótti.
EQYU Syrtqy ister mınıstrleri Keńesiniń otyrysy 8 jeltoqsanda jalǵasady jáne birqatar mınıstrlik sheshimder men deklarasııalardy qabyldaýmen aıaqtalady.
