Forým aıasynda «Týǵan ólkem – tiregim» atty jastar forýmy TEDTalks formatynda ótti. Nazarbaev ıntellektýaldi mektebinde ótken kezdesýde QR Parlamenti Senaty depýtaty Birǵanym Áıtimova, álemge esimi tanys alpınıst Maqsut Jumaev, tanymal óner qaıratkeri, «Ázil álemi» ázil-syqaq teatrynyń dırektory Tursynbek Qabatov, «Qazaqstan 2050» qozǵalysynyń jetekshisi, kásipker Muxtar Mankeev spıker sanatynda sóz aldy. Kópshilik jastar Batys Qazaqstan oblysynyń ákimi Altaı Kólginovtiń áńgimesine de yqylaspen qulaq túrip, qol soqty. Forýmǵa saıasattanýshy Saıasat Nurbek, «Azamattyq bastamalar zertteý ortalyǵy» KEAQ basqarma tóraǵasy Nurlan О́teshev arnaıy shaqyrylǵan.
- Forýmnyń maqsaty - týǵan ólkege degen súıispenshilik arqyly Elbasynyń «Rýxanı jańǵyrý» baǵdarlamalyq maqalasynda belgilengen negizgi maqsattardy júzege asyrýǵa jańa serpilis berý, ǵylym-bilim, óner, densaýlyq saqtaý, sport jáne azamattyq bastamalardy kúsheıtýge yqpal jasaý, - deıdi sharany uıymdastyrýshylar.
Mesenattar forýmynyń ekinshi bóligi «Rýxanı jańǵyrý» baǵdarlasynyń 4 negizgi kishi baǵdarlamalary – «Tárbıe jáne bilim», «Atameken», «Rýxanı qazyna» jáne «Aqparat tolqyny» boıynsha semınar-trenıngtarmen jalǵasady.
Forým Oral qalasy men barlyq aýdan ákimdikteri uıymdastyrǵan kórmemen qorytylanbaq. Bul kórmege «Týǵan jer» baǵdarlamasy aıasynda ózderiniń týǵan jerine demeýshilik kórsetken mesenattar jobasy qoıylady. Saltanat saraıynda ótetin forýmda jomart júrekti jandarǵa qurmet kórsetilmek.
«Týǵan jer» baǵdarlamasy aıasynda bıyl Batys Qazaqstan oblysynyń kásipkerleri týǵan jerine 1 mıllıard 600 mıllıon teńge kóleminde demeýshilik tanytqan eken. Osy qarjynyń 1 mlrd. teńgeden astamy balabaqshalar men baldyrǵandar úshin oıyn alańqaılaryn, medısınalyq nysandar men sport keshenderin salýǵa jumsalǵan.
- Mundaı áleýmettik mán-mańyzy zor nysandardyń kóptep iske qosylýy el-jurttyń erteńgi kúnge degen senimin bekitip, ári qoǵamdyq yntymaqty da nyǵaıta túsedi, - deıdi óńir basshysy Altaı Kólginov.
Qazbek QUTTYMURATULY,
«Egemen Qazaqstan»
