Osy turǵydan kelgende Mádenıet jáne sport mınıstrligi uıymdastyrǵan «Jyr arqaýy – jańǵyrý» atty respýblıkalyq aqyndar aıtysynyń basty ózegi táýelsizdik murattary men qundylyqtaryn pash etýge baǵyttalǵany onyń mártebesin bıiktete tústi. Aıtystyń aldyna qoıǵan maqsatyn oıdaǵydaı oryndap shyǵýyna Aqtóbe oblysynyń ákimdigi jan-jaqty qoldaý kórsetti.
Aıtys bıyl oblys ortalyǵynda paıdalanýǵa berilgen 1200 oryndy óner ortalyǵynyń konsert zalynda ótkizildi, jerebe tastalǵan kezde aıtystyń shymyldyǵyn ashý sáti atyraýlyq Saǵadat Nurmanov pen pavlodarlyq Qýanysh Sharmanovqa buıyrdy. Budan keıingi kezekte esimi respýblıka jurtshylyǵyna keńinen tanymal aıtystyń eren júırikteri men jas perileri órnekti sózderdiń kórigin qyzdyra tústi.
– Bıyl altynshy ret ótkizilgen «Altyn dombyra» báıgesiniń aldyna qoıǵan maqsatynyń biri jańa esimderdi tabý edi. Osy oıymyz oryndaldy dep bilemiz, bul rette eń aldymen Jambyl oblysynan kelgen Áset Dúısebaevtyń esimin ataı alamyz. Onyń ózin-ózi ustaýy, dombyra qaǵysy men maqamynyń úndestigi, óz oıyn aıqyn bildire alatyny – halyqtyń da, qazylar alqasy músheleriniń de kóńilinen shyqty, – deıdi qazylar alqasynyń tóraǵasy Qonysbaı Ábil.
Aıtys kezinde taldyqorǵandyq Jandarbek Bulǵaqov jáne almatylyq Syrym Áýezhan sekildi buǵan deıin shashasyna shań juqpaı kelgen kıeli ónerimizdiń tarlanbozdary búgingi kúni de óz baptarynda ekenin tanyta bildi. Jalpy, respýblıkalyq aıtysqa qatysqan aqyndardyń qaı-qaısy da táýelsizdiktiń ákelgen tabystaryn ashyp kórsetýge umtyldy. Táýelsizdiktiń el men halyqqa bergen qundylyqtaryn kesteli marjan sózdermen kórkemdedi.
Túr men mazmunnyń úılesimi turǵysynan alǵanda «Altyn dombyra» báıgesiniń bási bıik tur. Eń bastysy, aıtyskerlerdiń alǵa qoıylǵan taqyrypty asha bilýge degen umtylystary óz jemisi men nátıjesin bergenin aıtýdyń ózi bir mereı. Ári osy umtylys tutastaı alǵanda aıtystyń deńgeıi men órisiniń joǵary bolýyna áserin tıgizgeni kámil. Jasaqtalǵan qazylar alqasynyń quramy da esimderi elge keńinen tanymal, táýelsizdiktiń qadyr-qasıetin jáne elimizdiń keshegisi men búgingisin óz shyǵarmalaryna ózek etip ala bilgen halqymyzdyń aıtýly tulǵalary ekenin aıtý paryz. Bul rette halyq aqyndary Qonysbaı Ábil men Áselhan Qalybekova, Memlekettik syılyqtyń ıegerleri Qoıshyǵara Salǵarauly men Qajyǵalı Muqambetqalıev, aqyn, «Qurmet» ordeniniń ıegeri Meıirhan Aqdáýlet, fılologııa ǵylymdarynyń doktory Janat Áskerbekqyzy jáne «Altyn dombyra – 2014» baıqaýynyń jeńimpazy Balǵynbek Imash esimderin aıtpaı ketý esh múmkin emes.
Mádenıet jáne sport mınıstrligi Tilderdi damytý jáne qoǵamdyq saıası jumystar komıtetiniń tóraǵasy Qýat Borash bas báıgeni Jandarbek Bulǵaqovqa tapsyrǵan sátte halyqtyń oryndarynan turyp, qol soǵyp qoshemet kórsetýi qazylar men kórermenniń pikiri bir jerden shyqqanynyń dáleli.
Eńseli el bolýdyń joly qaı kezde de ońaı bolmaǵan. Eń aldymen ult rýhy asqaq túsken jaǵdaıda eldiktiń týy bıik bolmaq. Táýelsizdik merekesi qarsańynda Aqtóbede aıaqtalǵan respýblıkalyq aqyndar aıtysynyń bas júldesin ıelengen Jandarbek Bulǵaqovqa 3 000 000 teńgeniń sertıfıkaty tapsyryldy. Birinshi oryndy alǵan Syrym Áýezhanǵa eki mıllıon teńge buıyrdy. Budan keıingi júldeli oryndar qatarynan kóringen Jandarbek Naýshabek, Sara Toqtamysova, Aınur Tursynbaeva jáne Áset Dúısebaevtar da tıisinshe aqshalaı syılyqtarǵa ıe boldy. Táýelsizdik pen rýhanı jańǵyrý taqyrybyn jyrǵa qosqan alaman aıtysta birde-bir aqyn syı-qurmetsiz qalǵan joq. Muny da «Altyn dombyra» báıgesiniń taǵy bir artyqshylyǵy dep bilemiz.
Temir Qusaıyn,
«Egemen Qazaqstan»
AQTО́BE
