Jıyndy ashyp bergen oblys ákimi meıramnyń mańyzdylyǵyna mán berdi.
– Táýelsizdik kúni – elimizdiń eń uly merekesi. Armandaǵan azattyq tańyn qarsy aldyq. Prezıdent Nursultan Nazarbaev Táńirdiń uly syıy – Táýelsizdik ekenin aıtty. Egemendik jyldarynda Qazaqstan eńseli bıikterdi baǵyndyrdy. Árıne, bir jeńnen qol, bir jaǵadan bas shyǵarǵan birliktiń arqasy. Qaraǵandy jeri yntymaqtyń ólkesine aınaldy. Yntymaq bar óńirden yrys aınalmaıdy. Dostyǵymyz jarasa bersin, – dedi óńir basshysy.
Jıyn barysynda Elbasy Jarlyǵyna sáıkes, aımaqtyń saıası jáne qoǵamdyq ómirine belsene aralasyp, eldiń áleýmettik-ekonomıkalyq jáne mádenı damýyna eleýli eńbek sińirgen, ulttar arasyndaǵy dostyq pen yntymaqtastyqty nyǵaıtýǵa qosqan súbeli úlesi úshin birqatar azamattar memlekettik marapattarǵa ıe boldy.
Qaraǵandy memlekettik ýnıversıtetiniń rektory Erkin Kóbeev, Nura aýdanyndaǵy «Jaraspaı» JShS dırektory Seıilhan Qońyrbaev «Parasat» ordenin óńirine taqty. Sondaı-aq «Qurmet» ordenine Temirtaý qalasynyń ákimi Ǵalym Áshimov, oblystyq týberkýlezge qarsy dıspanser dırektory Noıan Bıdaıbaev, Qaraǵandy oblysynyń qurmetti azamaty Nıkolaı Drıjd, Abaı aýdanyndaǵy «Shans» sharýa qojalyǵynyń jetekshisi Igor Jabıak, «Qazaqmys Enerdjı» JShS atqarýshy dırektory Ahat Kalendarev, jezqazǵandyq eńbek ardageri Saǵyndyq Qojamseıitov, Qaraǵandydaǵy «Shyǵys» sharýa qojalyǵynyń jetekshisi Shamıl Osın, oblystyq máslıhat depýtaty Aıman Túkbaeva, Jezqazǵan qalasynyń ókili, eńbek ardageri Jaqsylyq Shoqtaev ıe boldy. Al «Shapaǵat» medaline qol jetkizgender qatarynda oblystyq máslıhat depýtaty Bekzat Altynbekov, qalalyq bastaýysh medısınalyq-sanıtarlyq kómek ortalyǵynyń dırektory Tatıana Bashırova, Qarajal qalalyq ortalyq aýrýhanasynyń perzenthana bóliminiń akýsheri Gúlnár Jaqypbekova, Buqar jyraý aýdandyq ortalyq aýrýhanasynyń hırýrgııa bóliminiń meńgerýshisi Mereke Jumaqaev, Jezqazǵan qalalyq ortalyq aýrýhanasy endoskopııa bólimshesiniń meńgerýshisi Beısen Kólbaev, oblystyq týberkýlezge qarsy dıspanser Jezqazǵan bólimshesiniń ftızıatr-dárigeri Marııash Orazbekova boldy. «Qazaqstannyń eńbek sińirgen qaıratkeri» ataǵy Qaraǵandy qalasynyń qurmetti azamaty Rymbala Omarbekova jáne eńbek ardageri Jaǵypar Álimhanovqa tabystaldy.Jıynda III dárejeli «Eńbek dańqy» ordeni, «Eren eńbegi úshin» medali jáne qurmet gramotalary tapsyryldy.Saltanatty jıynnyń eń eleýli sátteriniń biri, árıne ol Qaraǵandy oblysynyń qurmetti azamaty atanǵan azamattardyń esimin aıtatyn mezet. Áýeli aımaq basshysy qazynaly ólkeniń týmasy, memleket jáne qoǵam qaıratkeri, Uly Otan soǵysynyń ardageri Kamalı Dúısembekov aǵamyzǵa «Qurmetti azamat» ataǵyn tapsyrý úshin sahnadan tústi. Sonymen qatar «Halyq qaharmany», armııa generaly Muhtar Altynbaev aǵamyzǵa oblystyń Qurmetti azamaty ataǵy berildi. Generaldyń úlken ómirge sapary kómirli ólkeden bastalǵany belgili.
– Jerlesterime myń alǵys. Bul qurmet – maǵan kórsetilgen zor senim dep bilemin. Men alǵash osy jerden kókke kóterildim. Syıdyń úlkenin Qaraǵandy jurtynan kórgenime rızamyn, – dedi general. Sonymen qatar bul ataqqa Alashtyń týyn aspandatyp júrgen atpal azamat, chempıon Gennadıı Golovkın de ıe boldy.
– Búgin úsh batyr Qaraǵandy oblysynyń qurmetti azamaty atandy. Biri – ózderińiz biletin syıly aǵamyz Kamalı Jumataıuly. Halyq qaharmany, general Muhtar Altynbaevtyń orny bir bólek. Jáne álem tanıtyn Gennadıı Golovkınge Qurmetti azamat ataǵyn berýdiń oraıy kelip tur. Jurt biletindeı, Gennadıı kezekti jekpe-jegine daıyndalý úshin jattyǵý jıynynda júr. Buıyrtsa, Qaraǵandyǵa keledi dep oılaımyn. Saltanatty rásimde ataqty tapsyramyz, – dedi oblys ákimi.
Toptamany daıyndaǵan
Mıras ASAN,
«Egemen Qazaqstan»
Qaraǵandy oblysy
Sýretterdi túsirgen
Dmıtrıı Kýzmıchev
