Saıystyń maqsaty - óńirdiń ekonomıkalyq, áleýmettik, rýhanı damýyna úlesin qosyp, eldiń tynys-tirshiligine kómegin tıgizip otyrǵan azamattardyń eńbegin baǵalap, arnaıy marapattar arqyly mereıin ósirip, qanattandyrý.
Baıqaýǵa Mańǵystaý oblysynda turaqty turatyn, jyl boıy úzdiksiz eńbek etken, óz salasynyń maıtalmandary qatysty.
Konkýrsqa óńirdiń ár túkpirinen 1 qarasha men 10 qarasha aralyǵynda 50-ge jýyq ótinish kelip túsken. Saıystyń 1-kezeńinde úmitkerlerdi saraptaý komıssııasy iriktegen bolatyn. Al, 2-kezeńde uıymdastyrý alqasy jeńimpazdardy ár nomınasııa boıynsha anyqtaǵan.
Osy jyly «Jyl adamy-2017» ataǵyna 19 úmitker laıyq dep tanyldy. Ár nomınasııa jeńimpazdaryna dıplom, estelik syılyǵy men aqshalaı qarajat tabystaldy.
Sharada barysynda aımaq basshysy Eraly Toǵjanov: «Barshańyzdy elimizdiń aıtýly merekesi Táýelsizdik kúnimen quttyqtaımyn! Elbasymyz aıtqandaı, «El qýatty bolmaı, baq turaqty bolmaıdy. Turaqtylyq - birlik pen tatýlyq bolǵan jerde ǵana júredi». Egemen eldiń órleýi men órkendeýine ólsheýsiz úles qosyp, azat eldiń aıaǵyna nyq turýyna atsalysqan azamattardyń ǵıbratty ǵumyry buǵan dálel bolmaq. «Isi keneýliniń eńbegi eleýli" deıdi dana xalqymyz. San salaǵa serpin berip, tyń tynys ákelgen, zor qajyr-qaırat, erekshe erik-jiger tanytqan eńbekqor jandar esimi el jadynda máńgi jańǵyrmaq. El ıgiligi úshin eńbek etý – asyl is. Osy oraıda, bizdiń óńirde bilikti de bilgir, básekege qabiletti óz isiniń sheberlerin syı-qurmetke bóleý – birneshe jyldan bergi ıgi dástúr. Bul dástúr adal eńbekpen abyroıly iske bas bolǵan jandardy jańa tabystarǵa yntalandyryp, óskeleń urpaqty otansúıgishtik qasıetke baýlıtyn ónege bolary anyq»,- dedi.
Marapattaý rásiminen soń Mańǵystaý oblysynyń ákimi Eraly Toǵjanov aıtýly «Men Qazaqpyn» jobasynyń jeńimpazy Ospan Qulsymaqqa at mingizdi.
«Jyl muǵalimi» - Beıneý polıtehnıkalyq kolledji, «Kompıýter qurylǵylaryna qyzmet kórsetý tehnıgi» mamandyǵynyń arnaıy pán muǵalimi Elmurat Aıapov;
«Jyl tárbıeshisi» - Qaraqııa aýdany, «Bolashaq» balabaqshasynyń tárbıeshisi Gúlaıym Bóltekova;
«Jyl ǵalymy» - Sh. Esenov atyndaǵy KMTjIÝ «Fızıka jáne matematıka» kafedrasynyń meńgerýshisi, pedagogıka ǵylymdarynyń kandıdaty Asyl Kasaeva;
«Jyl dárigeri» - «Jańaózen Qalalyq Ortalyq Aýrýhana» ShJQ MKK, jan saqtaý bóliminiń meńgerýshisi Amanbaı Orynalıev;
«Jyl medbıkesi» - Túpqaraǵan aýdandyq ortalyq aýrýhanasynyń ýchaskelik meıirbıkesi Qatıra Epenova;
«Jyldyń úkimettik emes uıymy» - «Mańǵystaý oblystyq Azamattyq alıansy» ZTB prezıdenti Jibek Ahmetova;
«Jyl jýrnalısi» - «Habar Agenttigi» AQ Mańǵystaý oblysyndaǵy menshikti tilshisi Gúlmıra Ábisheva;
«Jyl sportshysy» - Karate-dodan álem chempıony, Azııa chempıony, Qazaqstan chempıonatynyń birneshe dúrkin chempıony Erkinbek Baıtóreev;
«Jyl polıseıi» - Jańaózen qalalyq ishki ister basqarmasy, tergeý bóliminiń aǵa tergeýshisi, polısııa maıory Nurjan Shúrenov;
«Jyldyń mádenıet jáne óner qyzmetkeri» - Qazaqstannyń eńbek sińirgen qaıratkeri, M. О́skinbaev atyndaǵy fılarmonııasy ult aspaptar orkestriniń kórkemdik jetekshisi, ári bas dırıjery Rahat Madreev;
«Jyl fermeri» - Beıneý aýdany, «Bergen Bek» aýyl sharýashylyǵy kooperatıviniń tóraǵasy Kerýen Qyrymqulov;
«Jyl jebeýshisi» - «PRESTIGE» kompanııasynyń bas dırektory Irına Belıaeva;
«Jyldyń úzdik áleýmettik qyzmetkeri» - Munaıly aýdany ákimdiginiń «Halyqty jumyspen qamtý ortalyǵy» KMM dırektory Záýresh Nurbolat;
«Jyl munaıshysy» - «О́zenmunaıgaz» AQ, ınjenerlik-tehnologııalyq qyzmet ortalyǵynyń basshysy Asylbek Aıtmambetov;
«Jyl qurylysshysy» - «Aktaý NSh» JShS dırektorynyń keńesshisi Nurbek Kúnshyǵarov;
«Jyldyń úzdik turǵyn úı – kommýnaldyq sharýashylyq qyzmetkeri» - «Mańǵystaý Jylý» MKK, jylýmen, káriz júıesimen qamtamasyz etý ýchaskesiniń ýchaske basshysy Maqsat Qulshyqov;
«Jyldyń áskerı qyzmetkeri» - «Jaǵalaý kúzeti óńirlik basqarmasy» RMM, áskerı psıholog, maıor Rýslan Báıimbetov;
«Jyl kásipkeri» - «Neıron» JShS bas dırektory Gúlshara Chagaı;
«Jyl janalyǵy» - «Men Qazaqpyn» jobasynyń jeńimpazy Ospan Qulsymaq bolyp tabyldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
