Sýretterdi túsirgen Erlan Omar, "Egemen Qazaqstan"
Biz endi osynaý oqıǵalardyń bel ortasynda bolǵan adamdarmyz. Bári de taıǵa tańba basqandaı kókiregimizde saırap tur. Keńes Odaǵy degen ımperııa qulap, tas-talqan bolyp jatqan kezde respýblıkalardyń árqaısysy jeke shańyraq kóterip, el bolyp jatty. Biz de qudaıǵa táýbe dep, 1991 jyly búkil halyq bolyp Elbasymyzdy saıladyq. Sol kezde saılaýdyń shtabyn basqarǵanym esimde. 98,8 paıyzdyq daýyspen Nursultan Nazarbaev Prezıdent bolyp saılanǵan edi.
16 jeltoqsanda Qazaqstannyń Táýelsizdigi jarııalandy. Sodan beri qaraı Elbasy qolyna memleketimizdiń tizginin alyp, qırandydan, byt-shyt bolyp tamtyǵy qalmaǵan, respýblıka degen aty bar, zaty joq memleketten Táýelsiz Qazaqstandy ornatty. El Prezıdenti qazaqstandyq joldy aıqyndap, damý kezeńi bastalǵannan keıin Qazaqstandy álem tanyp, moıyndady.
Men kóptegen oqıǵalardyń ishinde bolǵan adammyn. Elbasymen birge otyryp, sol kisiniń qasynda júrip, Qazaqstanda tuńǵysh quryltaı ótkizdik. 1991 jyly jeltoqsannyń 10-y kúni Tuńǵysh Prezıdentti taqqa otyrǵyzý rásimin ótkizdik. Sol rásimdi basqarý meniń pesheneme jazylǵan edi. Mine, osy sátterdiń barlyǵy kitapta jazylǵan.
Kitap úlken tórt bólimnen turady. Sol tórt bólimde Elbasy basynan aıaǵyna deıin marjandaı qylyp, bizdiń úsh rýhanı jańǵyrýymyzdy kórsete bildi. Biz Táýelsizdik alǵannan beri jańǵyryp kele jatqan elmiz. Sondyqtan bul kitap jas balalardan bastap, eńkeıgen kárilerge deıin qolynan túspeıtin kitap bolar degen senimdemin.
Myrzataı JOLDASBEKOV,
memleket jáne qoǵam qaıratkeri
