Jyl saıynǵy qalyptasqan dástúrge sáıkes bıylǵy keshtiń qadirli qonaǵy Qazaqstannyń eńbek sińirgen qaıratkeri, aqyn Júrsin Erman boldy. Odan ózge rýhanııat janashyry Rymbala Omarbekova bastaǵan el aǵalary báıgetóbeniń sánin kirgizip otyrdy. Rymbala Kenjebalaqyzy tek qana kórermender qatarynda otyrmaı, jas qalamgerlerdi yntalandyrý maqsatynda daıarlaǵan syı-syıapatyn qosa ákelipti. Osynaý ıgilikti is-sharanyń ótkizilýine belgili aıtysker aqyn Aıtbaı Jumaǵulov muryndyq boldy. Bir aıta keterligi, atalmysh jyr músháırasynyń jeńimpazyn saıysqa qatysýshy aqyndardyń ózderi bir-birine daýys berý arqyly anyqtady. Osy rette biz alty jyl boıy arqa aqyndaryn ardaqtap, Jumabekteı asyl erdiń atyn asqaqtatyp júrgen jany jomart kásipker, sharýa demeýshisi Sapar Ipkeev myrzany aıta ketkenimiz jón. Kásipker músháıra qorytyndysyna sáıkes, jyr báıgesinde jeńiske jetken Aızadanyń jaqyn ýaqytta jyr kitabyn jaryqqa shyǵaryp beretin bolady. Sondaı-aq «Syrshyl aqyn» atalymyna QarMÝ-dyń stýdenti, jas aqyn Erik Naryn ıe boldy. Al «Jyldyń úzdik jazýshysy» atalymyna Bekzat Altynbek esimdi jas jazýshy laıyq dep tanyldy. «Jyldyń úzdik qaıratkeri» atalymyn jýrnalıst, oblystyq «Ortalyq Qazaqstan» gazeti bas redaktorynyń birinshi orynbasary Ersin Musabek enshiledi. Al «Jyldyń úzdik aıtysker aqyny» Nurmuhamed Baısúgirov boldy.
«Buǵan deıin de ózimniń jyly sózimdi jetkizdim. Oǵan ózderińiz de kýásizder. Jasandy dúnıe emes, shyn kóńilimnen aıttym ony. Poezııada burylys jasaý degen bolashaǵynan zor úmit kúttiretin aqynnyń ǵana qolynan keledi. Sondaı burylysty men Aızadanyń jyrynan kórdim. Qanatyń talmasyn, aınalaıyn», dep tilegin bildirdi Júrsin Erman.
Mıras ASAN,
«Egemen Qazaqstan»
Qaraǵandy oblysy
