27 jeltoqsanda Atyraý oblystyq ákimdiginde quqyq buzýshylyqtyń aldyn alý jóninde vedomstvoaralyq komıssııanyń otyrysy ótti dep habarlaıdy Atyraý oblystyq óńirlik kommýnıkasııalar qyzmeti.
Oblys ákimi Nurlan Noǵaevtyń tóraǵalyǵymen ótken jınalysqa barlyq quqyq qorǵaý jáne qadaǵalaý organdary men quzyrly memlekettik qurylymdardyń basshylary qatysty. Kún tártibindegi máselelerdiń birin qaraý barysynda aımaq basshysy brakonerlikpen kúres boıynsha atqarylǵan jumystar týraly esepti tyńdady.
«Bekire-2017» tabıǵat qorǵaý aksııasy kezinde 826 zań buzýshy ákimshilik jaýapkershilikke tartyldy, 21 is boıynsha sot sheshimi shyqty. Balyq qorǵaý zańnamasyn buzǵandarǵa 13 mln teńge ákimshilik aıyppul salyndy. Balyq qoryna zalal keltirgeni úshin balyq qorǵaý zańnamasyn buzǵandarǵa 2 mln 230 myń teńge kóleminde qýynym berildi. 64 tonna balyq tárkilendi, onyń 3 tonna 126 kılogramy bekire tuqymdas jáne 11 kg ýyldyryq. Zańsyz aınalymnan 118 júzý quraly men 42 birlik avtomotokólik shyǵaryldy.
Nurlan Noǵaev barlyq deńgeıdegi memlekettik organ qyzmetkerleri turǵyndarmen túsindirý jumystaryn júrgizý kerektigin atap ótti. Jınalysta turǵyndardyń zańsyz balyq aýlaýmen aınalysýlaryna sebep joqtyǵy da aıtyldy. Aımaqta ár túrli salada laıyqty jumys tabýǵa qajet jaǵdaıdyń bári jasalýda.
Aımaq basshysy orynbasarlaryna naqty tapsyrmalar berdi.
-Az jumys istelgen joq, biz biraz oń kórsetkishterge qol jetkizdik, biraq áli de qyzmetimizdi kúsheıtýimiz kerek,-dedi Nurlan Noǵaev.- Brakonerlik - bizdiń qoǵamnyń azǵyndyǵy, onyń tamyryna balta shabýymyz kerek, ol úshin memlekettik organdar ózara árekette jumylyp jumys isteýi tıis. Balyq aýlaýmen zańdy turde aınalysqysy keletin balyqshylar salyq organynda jeke kásipker retinde tirkelip, balyq tapsyratyn óndiristik kooperatıvtermen resmı kelisim shartqa otyrýlary kerek. Bári ashyq, aıqyn bolýy qajet.
Baqytgúl Babash,
"Egemen Qazaqstan"
