Rodnıkovka turǵyndary úshin 320 oqýshyǵa arnalǵan jańa mekteptiń ashylýy qýanyshty oqıǵa boldy. Jobany júzege asyrýǵa «Nurly jol» baǵdarlamasy aıasynda 700 mln. teńge bólingen. Úsh qabattan turatyn ǵımarat zamanaýı bilim berý talaptaryna tolyq sáıkes keledi: kompıýterlik synyptar, kitaphana, psıholog pen logoped mamandarynyń kabınetteri, sport jáne akt zaldary, ashana, fızıka, bıologııa, hımııa, ınformatıka kabınetteri bar, tórt ınteraktıvti taqtamen, mýltımedııalyq jabdyqtarmen, tehnologııa sabaqtaryna arnalǵan tigin mashınasy men túrli tehnologııalarǵa arnalǵan stanoktary bar sheberhanalarmen jaraqtanǵan.
Mektep aýlasynda balalardy fızıkalyq turǵydan damytýǵa arnalǵan jaqsy sporttyq baza jasalǵan: fýtbol alańy men júgirý joldary bar stadıon, voleıbol, basketbol alańy, balalarǵa arnalǵan oıyn alańy, demalys aımaǵy qarastyrylǵan.
Irgesi 1969 jyly qalanǵan aýyl mektebiniń eski ǵımaraty apattyq jaǵdaıda dep tanylyp, balalar onyń jarty bóliginde oqýǵa májbúr boldy.
Ashylý saltanatynda sóz sóılegen oblys ákimi Berdibek Saparbaev aıtqandaı árbir el damyǵan memleketke aınalýy úshin eń aldymen, bolashaq urpaqtyń deni saý, myqty bolyp, laıyqty bilim men tárbıe alýyn oılastyrýy tıis.
- Prezıdentimiz Nursultan Ábishuly Nazarbaevtyń basshylyǵymen Qazaqstanda 26 jylda, ásirese, bilim berý, densaýlyq saqtaý, mádenıet pen sport salasynda kóptegen ıgi jumystar jasaldy. Biz barlyǵymyz buǵan kýámiz. Bıyldyń ózinde Aqtóbede 32 mektep salynyp, onyń 15-i tapsyryldy, sonyń ishinde sizdiń mektep te bar,-dep atap ótti óńir basshysy. - Jańa jyl qarsańynda oblys basshylyǵynyń atynan barlyǵyńyzdy kele jatqan jańa 2018 jylmen quttyqtaımyn. Barlyǵyńyzǵa denmaýlyq pen amanshylyq tileımin. Jańa jyldaryńyz ben jańa mektep qutty bolsyn!
Bul kúni aýylda memlekettik - jekemenshik áriptestik aıasynda salynǵan jańa dárigerlik ambýlatorııa da turǵyndarǵa qyzmet kórsete bastady. Aýmaǵy 400 sharshy metrdi quraıtyn ambýlatorııa barlyq standarttarǵa saı jabdyqtalǵan. Munda kúnine 50 adam medısınalyq kómek ala alady. Zamanaýı medısınalyq mekemede dárigerge deıingi qabyldaý, em-shara, ekpe, akýsherlik, zararsyzdandyrý, tirkeý, medmuraǵat kabınetteri jáne dárihana men tórt oryndyq kúndizgi stasıonar ornalastyrylǵan. Joba quny 95 mıllıon teńge.
